Супермодель ва тўғри овқатланиш бўйича мутахассис Мей Маск яқинда ўзининг китобини чиқарди, унга кўра, турмуш ўртоғи билан ажрашгандан кейин қандай қилиб уч фарзандини тарбиялагани ҳақида айтиб берган. Ўша пайтда Мей 31 ёш эди. Маскнинг сўзларига кўра, оила учун чиндан ҳам қийин давр бўлган – болаларга бошпана, яхши овқат ва керакли нарсалар учун тинимсиз ишлаш керак эди.
Мей, аввало, болаларида меҳнатга муҳаббатни кучайтирди – бу унинг тарбия услубидаги асосий тамойилларидан бири. Тартиб-интизом ва касбга муҳаббат ўз мевасини берди, Мейнинг ҳар бир боласи таниқли ва ўз соҳасида катта ютуққа эришди.
Илон Маск Мейнинг катта ўғли, муҳандис, ихтирочи, электромобиллар ишлаб чиқариш билан шуғулланадиган Tesla ҳамда космик кемалар қурувчи SpaceX компаниясининг ташкилотчиси ва директори. Укаси Кимбал ресторан эгаси, синглиси Тоска эса режиссёр ва продюсер. Унинг 40 дан ортиқ лойиҳалари мавжуд.
Мей 8 ёшидан ишлашни бошлаган. Унинг оиласи шифокорларга қўшни бўлиб яшар эди. Шунда Мей синглиси билан хат юборишга ёрдам бериб, соатига беш цент ишлаб топар эди. Қизлар 12 ёшга тўлганида эса отасининг шифохонасида ишлай бошлади. Улар беморларга қабул вақтини тайинлар, чой келтириш ва бошқа енгил ишларни бажарарди.
«Ота-онам мени қандай тарбиялаган бўлса, худди шундай усулни фарзандларимда қўлладим: мустақил, ҳалол, меҳрибон, эътиборли ва одобли. Шунингдек, мен уларга кўп меҳнат қилиш ва хайрли ишлар қилиш қанчалар муҳимлигини англатдим. Улар билан ҳеч қачон болалардек муносабатда бўлмаганман ва уришмаганман. Ҳаттоки ҳеч қачон нимани ўрганиши кераклигини ҳам айтмаганман. Бундан ташқари, сира ҳам уларнинг уйга вазифасини ҳам текширмадим, бу ўзларининг мажбурияти эди», − дейди Мей.
Мей Маскнинг сўзларига кўра, болалар танловни ўзлари қилиши керак ва бу учун тўлиқ жавобгарликни ҳам зиммасига олиши керак, чунки бу уларга кейинги ҳаётида, албатта, ёрдам беради. Масалан, у фарзандларига қайси коллежда ўқиши, қандай касб танлаши, бунинг учун йиғиладиган ҳужжатлар ва анкеталарни тўлдиришни ўзларига қўйиб берган.
«Фарзандингизга одоб-ахлоқни ўргатинг. Улар нима хоҳлашларини ўзлари ҳал этсин» – дейди Мей Маск.
Шунингдек, супермодель ота-оналарга фарзандларига енгил ва бой ҳаётни тақдим этишга уринмасликни маслаҳат беради. Масалан, унинг фарзандлари коллежда ўқиётган пайтда жуда қийин шароитда яшаган. Улар ерга тўшалган матрасда ва беш кишидан иборат гавжум хонада ухлаган, аммо бу уларга зарар бермаган.
Бироқ Мейнинг тўнғич ўғли Илон бу масалада бошқача фикрда. Сабаби унинг 6 фарзанди ҳашаматли қасрда яшайди ва фақат таклифнома билан кириш мумкин бўлган хусусий таълим муассасаларида ўқийди.
Изоҳ (0)