Турмушимизни енгиллаштирадиган, кунимизга ярайдиган ихтиролар аёллар, янада аниқроғи уй бекалари томонидан ўйлаб топилган.
Идиш ювадиган машина
Энг биринчи идиш ювадиган машина прототипи 1850 йилда эркак томонидан ўйлаб топилган. Аммо у қоғозда қолиб кетган. Унда кўплаб нуқсонлар бўлган, қўпол, камида қўл меҳнати билан ишлатилиши керак бўлган. Бугунги кунда биз ишлатадиган идиш ювиш машинаси эса америкалик уй бекаси Жозефина Кокрейн томонидан ўйлаб топилган. Айнан у машина учун финжонлар, тарелка ва идишлар қўйиш учун алоҳида металли конструкция ишлаб чиққан. Шунингдек, у машинага электр мотор ўрнатган ва идиш-товоқлар бенуқсон ювилиши учун сув босимини ҳам кўздан қочирмаган. Буларнинг барини Кокрейн уйининг омборхонасида амалга оширган.
Болалар тагликлари
Бугунги кунда кўпчиликнинг корига ярайдиган тагликлар ҳам бошқа бир америкалик аёл Марион Донован томонидан ўйлаб топилган. Vogue журнали муҳаррири декретда вақти қизининг чойшабларини «боплаб» қўйишидан чарчаган. Ушбу муаммога ечим топиш учун Марион қизига ваннага тутиладиган клёнкали матодан таглик тикишга қарор қилган. У ушбу тагликдан асос сифатида фойдаланиб, ичига мато қўйган. Доновоннинг ушбу ихтироси болалар учун хавфсиз ва терисига зарар етказмаган. Ушбу ихтиро журнал муҳарририга муваффақият олиб келганидан кейин аёл журналистликни ташлаб ихтиролар билан шуғулланишни бошлаган. Сочиқлар учун диспенсер, шкаф учун органайзер, тиш тозалайдиган ип ва бошқа бир қанча биз кундалик турмушда фойдаланадиган нарса ва буюмлар айнан ушбу аёл томонидан ўйлаб топилган.
Сувини ўзи сиқадиган полювгич
Ушбу ихтиро ва унинг муаллифи ҳақида фильм суратга олинган ва унда Женнифер Лоуренс, Роберт Де Ниро ва Бредли Купер суратга тушган. Картина оддий бўлмаган ҳаёт тарзи ва оддий уй бекаси Жой Манганонинг қийинчилик билан эришган муваффақияти ҳақида ҳикоя қилади. Уч нафар фарзандини ёлғиз катта қилган, камига эрталабдан кечгача ишлайдиган аёл уйга қайтганидан кейин чарчаганидан юмушларни бажаришга ҳоли қолмайди. Катта уйнинг полини ювиш унга қийинчилик туғдиради ва айнан шу нарса унга сувини сиқадиган механизмли полювгич ўйлаб топишга туртки бўлади. Мангано ихтиросидан бошқалар хабардор бўлиши учун кўп нарсани босиб ўтади ва аксари аёлларнинг уй юмушлари енгиллашишига сабабчи бўлади. Тақдири осон кечмаган ушбу аёл қисқичли ва сирпанмайдиган кийим илгичлар ўйлаб топган.
Қанчалик ҳайратланарли туюлмасин, машина ойна-тозалагичлари, бронежилет, дискли арра ва қор тозалайдиган машина ҳам оддий котиба ва уй бекалари томонидан ўйлаб топилган. Улар ўз ихтироси билан нафақат ўзини, балки эркаклар ҳаётини енгиллаштиришга ҳаракат қилган.
Изоҳ (0)