NASA’нинг Кеннеди номидаги космик маркази муҳандислари Флоридада «Артемида-1» миссияси доирасида инсонларни Ойга юборишга мўлжалланган ўта оғир ракета-ташувчини йиғишни якунлади, деб хабар беради IXBT.
11 июнь куни ракетанинг асосий 65 метрли бўлагини иккита бироз кичик тезлаштиргичлар орасига тушириш ишлари якунланди. Таъкидланишича, ракетанинг муҳим учта элементи биринчи бор учириш конфигурацияси билан бирга йиғилган.
NASA томонидан SLS (Space Launch System) номи остидаги ракета устида ишлар ўн йиллардан буён давом этиб келаётганди.
Ёзда Orion космик кемаси экипажининг янги капсуласи SLS’га ўрнатилади ва «Артемида-1» миссияси доирасида йил охирига бориб Ой атрофида экипажсиз синов парвози амалга оширилади. SLS ва Orion космик кемасини йиғиш ишлари якунлангач, ракета узунлиги 98 метрга етади. NASA вакилларининг маълум қилишича, барчаси режадагидек кетса, парвоз 2021 йилнинг ноябрида амалга оширилади. Инсонларни Ойга юбориш 2023 йилга режалаштирилган.
Эслатиб ўтамиз, 2019 йилнинг сентябрида Lockheed Martin корпорацияси Ойга учириладиган Orion космик кемасини қуриш бўйича шартномани ютиб олган эди. NASA Lockheed Martin’га 2030 йилнинг 30 сентябрига қадар максимум 12 та кема қуриш мажбуриятини юклаган. Артемис 3-5 миссиясидаги дастлабки учта Orion кемаси 2,7 миллиард долларга баҳоланган.
Мавзуга доир: АҚШ бошчилигидаги 8 та давлат Ойдаги табиий ресурсларни қазиб олиш ҳақида келишув имзолади. Улар орасида Россия ва Хитой йўқ
Изоҳ (0)