«Made in India» хити ижрочиси Алиша Чинай: Ҳиндистоннинг поп маликаси бугун нималар билан банд? (видео)

2022 йил 18 март куни Ҳиндистон поп маликаси 57 ёшга тўлди. Қуйида хонанданинг муваффақият йўли ҳамда бугунги кундаги фаолияти ҳақида сўз боради.

Алиша 1965 йил 18 мартда Аҳмадободда туғилган. Унинг ҳақиқий исми Сужата, лекин у карьера учун Алиша тахаллусини олди. Аслида бу унинг амакиваччасининг исми. Унинг отаси Мадхукар Чинай классик қўшиқчи бўлган. Онаси эса пианино чалган. Ота-она болалигидан қизини қўшиқчи бўлишга тайёрлаган, аммо Алишанинг сўзларига кўра, дадаси уни классик мусиқа билан таништиришга ҳаракат қилган ва у кўпроқ Ғарб мусиқасини ёқтирган. Айниқса, The Beatles ва Барбара Стрейзандни севиб тинглаган.

Алиша кино саноатига 19 ёшида кириб келган. У Маҳеш Бҳаттнинг «Туғилиш» (1985) фильмида Кумар Гаурав билан биргаликда актриса сифатида дебют қилиши керак эди, лекин кейинчалик режиссёр фикрини ўзгартирди ва Алиша актёрлик карьераси ўрнига қўшиқчи сифатида фаолиятини бошлади.

Уни мусиқа оламига бастакор Баппи Лаҳири таништирди, у билан бирга 1980 йиллардаги фильмлар учун энг яхши альбомларни чиқариш орқали Болливудда машҳурликка эришди: «Ўйна, ўйна», «Гуру», «Севги, севги, севги», «Коммандо» ва ҳоказо. У 1984 йилда «Тарзаннинг саргузаштлари» фильмида қўшиқчи сифатида дебют қилди ва у учун бешта тарона ёзди. Бир йил ўтгач, у «Сеҳр» деб номланган биринчи альбомини чиқарди.

Шундан кейин у кўплаб машҳур муаллифлар билан ишлаган ва поп мусиқа оламида шов-шувларга эришган юлдузга айланди. Унинг Кишор Кумар билан биргаликда ёзилган «Ҳиндистон жаноблари» фильмидаги қўшиғига актриса Шридеви ёмғир остида кўк сарида рақсга тушди ва йилнинг энг оммабоп қўшиғига айланди.

1995 йилда Алиша «Made in India» номли яна бир яккахон альбомини чиқарди, бу унинг шуҳратини мамлакат чегараларидан ташқарига олиб чиқди. Шу билан бирга, хонанда бастакор ва хонанда Ану Маллик билан жиддий келишмовчиликка учради. Алиша уни зўравонлиги учун судга берди, шундан сўнг улар ҳеч қачон бирга ишламасликка қарор қилди. Гарчи баъзилар бу қўшиқчининг альбомини тарғиб қилиш учун шунчаки рекламаси деб таъкидласа-да, Алиша ва Ану 8 йил давомида бирга ишламади.

Бироқ, 2003 йилда улар Шаҳид Капурнинг «У қандай, муҳаббат?» (2003) дебют фильмида бирга ишлаш учун бир жамоага айланди. 2005 йилда «Банти ва Бабли» лойиҳаси учун «Кажра Ре» қўшиғини куйлаган Алиша Чинайнинг карьераси янги чўққига чиқди. Айшвария Рай ва Амитабҳ Баччан иштирокидаги қўшиқ хитга айланди ва Алиша энг яхши аёл қўшиқчи номинациясида ўзининг биринчи ва ягона Filmfare мукофотига сазовор бўлди.

Хонанданинг сўзларига кўра, унга бу қўшиқ учун бор-йўғи 15 000 рупий тўланган. Бундан ташқари, Yash Raj Films лицензия ҳуқуқини қўлга киритди ва Алишага ушбу композицияни ўз концертларида ижро этишни тақиқлади. Алиша Болливуддаги бундай вазиятдан шунчалик ҳафсаласи пир бўлганидан интервьюларнинг бирида шундай деди: «Мен фильмлар учун қўшиқ айтишни тўхтатдим. Чунки қўшиқ айтишга оғзимни очишим билан бошқа биров пул ишлаб олмоқда. Ҳиндистон Голливуд этикасига амал қилиши керак. У ерда ижрочиларнинг ҳуқуқлари ҳимояланган. Энди бу ерда ҳамма нарса ўзгаргандагина ҳинд киносида қўшиқ айтганимни эшитасиз».

Хонанданинг шахсий ҳаётига келсак, 1986 йилда у ўзининг менежери Ражеш Жаверига турмушга чиқди, аммо 9 йилдан кейин уларнинг никоҳи бузилди. Кейинчалик унинг канадалик мусиқачи Ромел Каззуа билан муносабатлари ҳақида миш-мишлар тарқалган бўлса-да, у билан турмуш қурмади ва фарзанди ҳам кўрмади.

Хонанда умри давомида узоқ йўлни босиб ўтган бўлса ҳам ёлғиз ҳаёт кечирмоқда, инглиз тилида қўшиқлар ёзади ва уларга продюсерлик қилади. «Мусиқа аренасига қайтаманми?» дея ўзига ўзи берган саволга хонанда шундай жавоб қайтарди: «Балки. Ҳар 10 йилда мен катта муваффақиятга эришаман. Балки, яна омадим келар».