Ижтимоий тармоқларда «Андижонкабель» қўшма корхонасида ишчилар иш ташлашга чиққани, корхонада ишлаб чиқариш тўхтаб, ишчиларга яна икки ой дам олиш берилиши айтилган хабар эълон қилинди. «Дарё» мухбири Умиджон Мамарасулов ҳолатга аниқлик киритиш мақсадида Хонобод шаҳрида бўлди.
«Андижонкабель» Ўзбекистон—Россия қўшма корхонаси вакиллари аввалига мухбир саволларига жавоб беришни истамаган. Бироқ такрорий уринишлардан сўнг мухбир корхона бош инженери Шуҳрат Нуриллаев билан суҳбатлашган.
Шуҳрат Нуриллаевнинг «Дарё»га билдиришича, корхонада ишлаб чиқарилаётган маҳсулотларнинг асосий қисми Россия, Украина ва Беларусга экспорт қилинади. Айни пайтда Украинада юз бераётган воқеалар қўшма корхона фаолиятига жиддий таъсир ўтказиб, иш ҳажми камайишига олиб келган.
«Қўшма корхонамизда 1100 нафардан ортиқ ишчи ишлайди. Ижтимоий тармоқларда тарқалган хабарда корхонамизда гўёки иш ташлаш ва бошқа ҳолатлар бўлгани кўрсатилган. Аслида ундай эмас. Маҳсулотларимиз асосан Россия, Украина ва Беларусга экспорт қилинар эди. Ҳозирги кундаги вазият сабаб айнан шу давлатларга маҳсулотларимизни юбориш, яъни экспорт қилиш оқсаб қолди. Бунинг ўзига яраша сабаблари бор. Биз фақат ички бозорга чиқараётган маҳсулотларимиз орқали корхонанинг бугунги ҳолатини ушлаб туришни мақсад қилганмиз ва ишчиларимизнинг ҳаммасини доимий иш билан таъминлаш, келгусида фаолиятимизни тўлиқ давом эттириш мақсадида иккита таклиф ишлаб чиққан эдик. Биринчи таклифимиз — барча ходимларни ҳисобга олганда иш ҳажми камлик қилаётганлиги сабабли тўртта сменада эмас икки сменада 12 соатдан иш ташкил қилиб, ходимларнинг маълум қисмига ихтиёрий тарзда дам олишга рухсат бериш эди. Иккинчиси эса танаффуслар билан ишлашни йўлга қўйишдан иборат эди. Аммо биринчи таклифимиз ходимлар томонидан қабул қилинмади. Сабаби ишчилар мақсадимизни нотўғри тушунишибди», — дейди Шуҳрат Нуриллаев.
Шуҳрат Нуриллаев шу йўл билан корхона ишчи ва мутахассисларини ушлаб туришни мақсад қилганини айтиб, айни кунда корхона ишлаб чиқаришда лозим бўладиган хом ашёларни сотиб олишга ҳам қийналиб қолганини айтмоқда.
«Мисол учун, дастгоҳлар, эҳтиёт қисмлар ва, бундан ташқари, ишлаб чиқаришда, яъни технологик жараёнда қатнашадиган импорт маҳсулотларимиз ҳам кўп. Ҳозирда шуларни сотиб олиш учун ҳам пул тушуми камайиб кетган. Май ойига келиб, жараён ўнгланса, шунга қараб ҳаммани ўз жойига қайтариб, тўрт сменада ишлашни йўлга қўйиш, экспортни тиклаш мақсадимиз бор эди. Жараённинг ўнгланиши 15—20 майларга прогноз қилинган эди», — дейди суҳбатдош.
Қўшма корхона масъулининг айтишича, май ойида ҳам вазият ўнгланмаса ва маҳсулотлар экспорти йўлга қўйилмаса, масъуллар иккинчи вариант — танаффуслар билан ишлашни режалаштирмоқда.
«Апрель ойига тўлиқ режаларимиз борлиги учун ой охирига қадар эски жадвалда ишлаб турамиз. Раҳбарият томонидан сотиш ва маркетинг бўлимимизга вазиятдан келиб чиқиб ички ва ташқи бозор географиясини кенгайтириш бўйича қўшимча топшириқ берилган. Улар ишни бошлашган. Вазият яхши томонга ўзгаришига ишончимиз комил. Бироқ вазият ўзгармаса, май ойидан иккинчи вариантга — танаффус билан ишлашга ўтишимиз ҳам мумкин. Яъни беш кун иш, икки кун шанба ва якшанба дам олиш тартибида ишлаш эҳтимолимиз бор. Май ойидан экспорт ҳажми пасайиши ҳисобига иш ҳажми ҳам пасаяди. Бу ҳолат ойлик маошларига ҳам таъсир қилади. Мисол учун 1,5 миллион олаётган одам 1 миллион олиши мумкин. Ушбу таклифимизни айтганимизда кўпчиликка маъқул келди», — дейди Шуҳрат Нуриллаев.
«Дарё» мухбири ишчи-ходимлар билан ҳам суҳбатлашишга ҳаракат қилган.
Ишчиларнинг айтишича, корхона маъмурияти томонидан иш ҳажми камайиб кетгани сабабли ходимларга навбат билан икки ой ишлаб, кейинги икки ойда ўз ҳисобидан таътил олиш таклифи берилган.
«Хуллас, буларнинг муддаоси амалга ошмоқда. Яъни ишчилар ишдан олиниб, икки ой дам олиб туради. Қолган ярим ишчи эса ишда қолади. Булар эски ва яхши ишлайдиган, ўзини кўрсатадиган ишчилардир. Шунда уларга ким ўзини ўрнини бўшатиб беради, деган саволни берганимизда, келишув асосида ишланади, дейишди. Кейин душанбадан жумагача ишланиб, шанба ва якшанба дам олинишини айтишди. Маҳсулотларимиз сотилмаяпти, омборда турибди. Заводда ҳақиқатан ҳам пул йўқ. Давлат томонидан заводларни юргизиш ва ички бозор учун пул бериларкан, лекин шу ҳам ажратилгани йўқ, дейишди. Шунингдек, Россиядаги уруш туфайли четга ҳам чиқолмаяпмиз, деган фикрларни айтишди», — дейди исмини айтмаган ходимлардан бири.
Хонобод шаҳар ҳокимлиги ахборот хизматининг маълум қилишича, Хонобод шаҳар ҳокими Машъалбек Тожибоев ижтимоий тармоқларда тарқалган хабарлардан сўнг сектор раҳбарлари билан бирга корхонага бориб, корхона директори ва айрим таклифлардан норози бўлган ишчи-ходимлар билан учрашган. Қайд этилишича, иккала томон ўртасида тушунмовчилик юзага келган. Натижада ходимлар томонидан норозилик билдирилган.
Хонобод шаҳар ҳокимлиги масъулларининг қўшимча қилишича, шаҳар ҳокими ташаббуси билан 14 апрель куни ҳудудда фаолият юритаётган тадбиркорлар томонидан вақтинча ишсиз қолиши мумкин ёки бошқа жойда ишлаш истагида бўлган ходимларга маълум муддатдан сўнг яна ўз иш жойига қайтиш шарти билан иш ўринлари таклиф қилинган.
«Дарё» воқеалар ривожини кузатишда давом этади.
Изоҳ (0)