Xiaomi компанияси Redmi Note 11 линейкасидаги янги смартфонлари — 11T pro ва 11T Pro, шунингдек, Redmi Buds 4 ҳамда Buds 4 Pro наушникларини тақдим этди, деб хабар беради GSMArena.
Redmi Note 11T Pro
Смартфонлар Full HD+ сифатни ва 144 герцли тасвир янгиланиш частотасини қўллаб-қувватлайдиган 6,5 дюймли IPS-экранлар билан жиҳозланган. Дисплейлар Corning Gorilla Glass 5 шишаси билан қопланган, бармоқ изи сканери ўчириб-ёқиш тугмасига ўрнатилган. Янги модель корпуси IP53 стандарти бўйича ҳимояланган — у енгил ёмғирга бардош бера олади.
Аппарат ичидан MediaTek Dimensity 8100 процессори, 6 ёки 8 гигабайт тезкор ҳамда 128/256/512 гигабайт ички хотира ўрин олади. Note 11T Pro’нинг аккумулятор сиғими 5080 мА/соатга тенг бўлиб, 67 ваттли тезкор қувватланиш функциясига эга. 11T Pro+ моделига эса сиғими 4400 мА/соатли аккумулятор ўрнатилган — 120 ваттли тезкор қувватланиш функцияси мавжуд.
Смартфонларга камералар сони тўртта: 64 мегапикселли асосий (Samsung GW1), 8 мегапикселли кенг бурчак (Samsung 4H7, 120 даража), 2 мегапикселли макро ва 16 мегапикселли фронтал.
Хитойда Redmi Note 11T Pro линейкаси 31 майдан бошлаб қора, кўк ва кумуш рангларида сотувга чиқади.
Расмий нархлар:
- Note 11T Pro 6/128 ГБ — 255 доллар;
- Note 11T Pro 8/256 ГБ — 315 доллар;
- Note 11T Pro+ 8/128 ГБ — 300 доллар;
- Note 11T Pro+ 8/256 ГБ — 330 доллар;
- Note 11T Pro+ 8/512 ГБ — 360 доллар;
- Note 11T Pro+ Astro Man 8/256 ГБ — 375 доллар.
Redmi Buds 4 ва Buds 4 Pro
Базавий модель 35 децибелгача фаол шовқин сўндирувчи 10 миллиметрли драйверга эга бўлган. Наушниклар ғилофсиз 6 соатгача, ғилоф билан эса 30 соатгача ишлай олади. Хитойдаги расмий нархи — 30 доллар.
Про-версия биринчи моделдан катта фарқ қилади ва ташқи кўриниши билан Apple AirPods Pro’ни ёдга солади. Наушник 45 децибелгача фаол шовқин сўндирувчи 10 миллиметрли драйверга ва олти миллиметрли твитерга эга. Гаджет кейссиз 9 соатгача, кейс билан эса 36 соатгача ишлай олади. Қурилманинг Хитойдаги расмий нархи 55 долларни ташкил этади.
Аввалроқ хитойликлар бир марта қувватланиш орқали 45 кунгача ишлай оладиган смарт-соатни тақдим этгани, Xiaomi юзни таниш функциясига эга «ақлли» эшикни ихтиро қилгани тўғрисида хабар берилганди.
Изоҳ (0)