2022 йилнинг энг ғалати ва ноодатий смартфонларидан бири тақдим этилди. Хитойда Duoqin F22 Pro — тугмали панелга эга Android-смартфонини сотувга чиқаради, деб хабар беради Hi-Tech.Mail.ru.
Янги модель пикселлар нисбати 960х640 ҳамда тасвир янгиланиш частотаси 60 герц бўлган 3,5 дюймли сенсор экранга эга бўлган. Дисплей Android 12 операцион тизимида тўлақонли ишлаш имконини беради.
Смартфонга Helio G85 процессори, 4 гигабайт тезкор, 64/128 гигабайт ички хотира ўрнатилган. Аккумулятор сиғими 2150 мА/соат. Юқори қисмида ҳошиянинг қалинлигига қарамай, фронтал камера корпуснинг остги қисмидан — тугмалар тагидан ўрин олган. Бироқ бу фойдаланувчиларга видеоқўнғироқлар вақтида ноқулайлик туғдиради, чунки кафт фронтал камерани беркитиб туради.
Шунингдек, асосий камера ҳам мавжуд, аммо унинг техник тавсифи ҳозирча маълум эмас. Duoqin компанияси аппрат сотуви қачондан бошланишини кейинроқ маълум қилади. Таъкидланишича, бундай смартфонлар мессенжерлар ва интернетдан фойдаланишни истайдиган, бироқ тугмали қурилмага боғланиб қолган кекса ёшли инсонларга мос келади.
Аввалроқ ноодатий Vivo телефони Гиннеснинг рекордлар китобига киритилгани, «шахмат дизайн»га эга Realme GT Neo 3T смартфони намойиш этилгани тўғрисида хабар берилганди.
Изоҳ (0)