Ўзбекистонда Ихтисослаштирилган акушерлик-гинекология ва репродуктология маркази ташкил этилади

Президентнинг «Оналар ва чақалоқлар саломатлигини муҳофаза қилиш ҳамда аҳоли репродуктив саломатлигини янада мустаҳкамлаш чора-тадбирлар тўғрисида»ги қарори лойиҳаси эълон қилинди.

Унга кўра, Республика ихтисослаштирилган акушерлик-гинекология ва репродуктология илмий-амалий тиббиёт маркази ва унинг Қорақалпоғистон ва вилоятлар ҳудудий филиаллари ташкил қилинади ҳамда оналар ва чақалоқларга янада самарали тиббий ёрдам кўрсатишнинг вертикал бошқарув тизими йўлга қўйилади.

Қайд этилишича, ушбу марказ Республика аҳоли репродуктив саломатлик маркази, Республика «Она ва бола скрининг» маркази ҳамда Республика ихтисослаштирилган акушерлик ва гинекология илмий-амалий тиббиёт маркази негизида ташкил этилади. Унинг филиаллари эса Республика аҳоли репродуктив саломатлик маркази ҳамда Республика «Она ва бола скрининг» маркази ҳудудий филиаллари негизида ташкил этилади.

Марказ фаолияти асосий вазифалари ва фаолият йўналишлари:

• репродуктив ёшдаги аҳоли, ҳомиладор аёллар, янги туғилган чақалоқлар скрининги, касалликлар профилактикаси, диагностикаси, даволаш ва реабилитация бўйича ихтисослаштирилган ҳамда юқори технологик тиббий хизмат кўрсатиш;
• генетик маслаҳатлашув, соғлом оилани режалаштириш, молекуляр-генетик диагностика, пластик ва эстетик гинекология, ёрдамчи репродуктив технологиялар каби соҳаларни ривожлантириш;
• республика, ҳудудий тиббиёт муассасалари ҳамда туман (шаҳар) тиббиёт бирлашмаларида репродуктив ёшдаги аҳоли, ҳомиладор аёллар, янги туғилган чақалоқларга кўрсатиладиган тиббий хизматларни мувофиқлаштириш, ихтисослаштирилган, юқори технологик диагностика ва даволаш амалиётларини жорий этиш;
• тиббиёт соҳасидаги таълим муассасалари билан ҳамкорликда репродуктив ёшдаги аҳоли, ҳомиладор аёллар, янги туғилган чақалоқларга малакали тиббий хизмат кўрсата оладиган тиббиёт кадрларини тайёрлаш ва қайта тайёрлашда иштирок этиш;
• репродуктив ёшдаги аҳоли, ҳомиладор аёллар, янги туғилган чақалоқлар касалликлари бўйича фундаментал, амалий ва инновацион илмий изланиш ҳамда тадқиқотлар олиб бориш, улар натижаларини кенг жорий этиш бўйича таклифлар ишлаб чиқиш;
• хорижий илмий-тадқиқот тиббиёт марказлари, клиникалар ва таълим муассасалари билан ҳамкорлик алоқаларини ривожлантириш, қўшма илмий лойиҳаларни амалга ошириш;
• тиббий туризм соҳасида тиббий хизматлар ва юқори малакали тиббиёт кадрларини тайёрлаш ва мазкур хизматлар экспорти ҳажмини ошириш.
• ёрдамчи репродуктив технологиялардан фойдаланиш, ушбу муолажаларга бўлган монеликлар ва чекловларни белгилаш;
• аҳоли репродуктив саломатлигини сақлаш ва мустаҳкамлашга кўмаклашувчи ҳаёт тарзини ва услубини оммалаштириш;
• ўсмирлар орасида репродуктив аъзолар патологиясини, ирсий касалликларни аниқлашга қаратилган тиббий-профилактика тадбирларини ташкил этиш ва ўтказиш.

Ҳудудий филиал фаолияти асосий вазифалари ва фаолият йўналишлари этиб қуйидагилар белгиланади:

• соғлом оилани шакллантириш, оналар ва чақалоқлар саломатлигини муҳофаза қилишда янги технологияларни йўлга қўйиш, туғма ҳамда ирсий касалликларни эрта перинатал ва неонатал даврда аниқлаш, чақалоқлар ўлими ва туғма ногиронликни камайтириш;
• репродуктив саломатликни сақлаш ҳамда никоҳ олди тиббий-генетик хизмати соҳасида фуқаролар тиббий билимларини ва тиббий маданиятини юксалтириш
• ўсмирлар орасида репродуктив аъзолар патологиясини, ирсий касалликларни аниқлашга қаратилган тиббий-профилактика тадбирларини ташкил этиш ва ўтказиш;
• ҳомиладорлик дастлабки уч ойида аёлларни кўп тармоқли туман (шаҳар) марказий поликлиникаси «Аёллар маслаҳатхонаси бўлими»да оммавий перинатал скринингдан ўтказиш, хавф гуруҳига кирган ҳомиладор аёлларда генетик текширувларни амалга ошириш чора-тадбирларини янада такомиллаштириш;
• чақалоқларни оммавий скрининг текширувидан ўтказиш орқали болаларда ирсий касалликларга барвақт ташхис қўйиш.

Ушбу ҳужжат лойиҳасининг муҳокамаси 25 сентябргача давом этади.