Деярли ҳар бир қиз пойабзал сотиб олгач, кутилмаган муаммога дуч келади. Бунга йўл қўймаслик учун стилистлар ҳатто дўконда ҳам махсус текшириш усулларини ишлаб чиқди, деб ёзади «Новий очаг».
Одатда пошнали туфли кийишни деярли барча аёллар ёқтиради. Лекин кун давомида унда ҳаракатланиш оёқда оғриқлар келтириб чиқаради. Шунинг учун улардан осонгина воз кечиш эмас, балки қулайини танлашни билиш керак.
Нима учун оёқда оғриқ пайдо бўлади?
Тадқиқотлар шуни кўрсатдики, баланд пошнали пойабзал оёқнинг таг қисмига ҳаддан ташқари босим ўтказади, бу эса оғриқ, бўғимларда ортиқча зўриқиш ва қадоқларга олиб келиши мумкин. Пошна қанчалик баланд бўлса, юриш пайтида мушакларнинг мувозанати бузилиши эҳтимоли шунчалик кўп бўлиб, уларни ҳаддан ташқари зўриқтиради. Ушбу номутаносиблик тизза ва товон оғриғи каби муаммоларга олиб келиши мумкин.
Харид қилишда асосий йўл қўйиладиган хатолар
Нотўғри ўлчам
Туфли харид қилишда товон ва оёқ ёйи орасидаги бўшлиққа эътибор бериш лозим, бу уларнинг бир-бирига мослиги учун зарур. Акс ҳолда юриш вақтида оёқнинг пойабзалда силжиши ва, албатта, оғриқ ҳамда ноқулайликка олиб келиши мумкин. Оёқ кийимнинг ўлчами йиллар давомида ўзгариб бораётганини билиб ҳайрон бўлишингиз мумкин. Ўлчамнинг ўзгариши гормонал ва ёш ўтиши билан юзага келадиган табиий юмшоқ тўқималарнинг ўзгариши билан изоҳланади. Шунинг учун ҳар сафар пойабзал харид қилганда, оёқларнинг узунлиги ва кенглигини ўлчашни унутмаслик муҳим. Ёдда тутинг, пойабзал ҳар доим ҳам ёзилган ўлчамга тўғри келавермайди, шунинг учун энг қулайини топмагунча бир нечтасини синаб кўрган маъқул.
Жуда баланд пошна
Жуда баланд пошна билан боғлиқ энг кенг тарқалган муаммолардан бири оёқ бўйлаб оғриқдир. Баланд пошна тўпиқ ва тиззада кўпроқ зўриқишни келтириб чиқаради, бу баландлик ошгани сайин ортади. Чунки бу пойабзаллар ҳаддан ташқари товон баландлигига эга, гарчи ўлчамлари жуда кичик бўлса ҳам. Шунинг учун пошнали туфли танлашда ўта баландини харид қилиш қилиш муаммо туғдириши шубҳасиз. Классик услубдаги ўртача ва қалин пошналар қоматни ҳам чиройли кўрсатади, оёқларда ҳам оғриқ келтириб чиқармайди.
Олд қисми очиқ туфли
Ушбу моделларни оёқда ушлаб турадиган ягона нарса — бу тўпиқ ва бармоқ соҳасидаги ингичка тасма. Вазн оёққа юкланганда, пойабзал товонда ажралиб чиқади, бу эса ноқулайликни келтириб чиқаради. Афсуски, бундай баланд пошналарда ҳам кўп ҳаракатланиш қийинчилик туғдиради. Шунинг учун оёқнинг шаклига мос келадиган ва уни пойабзалга маҳкамлаш учун етарли материалга эга бўлган пойабзални танлаш тавсия этилади.
Бармоқларнинг ноқулай ҳолати
Оёқ бармоқларининг учли туфлига сиқилишини кўриш жуда оғриқли. Оёқ бармоқларини тор жойга қўйиш билан бир қаторда, пойабзалнинг материали оёқ бармоқларини етарлича қопламаслиги муаммоси ҳам мавжуд. Бу уларни мувозанатни сақлаш учун кўпроқ зўриқишига мажбур қилади. Шунинг учун бармоқ қисмида кўпроқ материал ва думалоқ шаклга эга пойабзалларни танлаш лозим.
Дўконда пойабзалнинг қулайлигини қандай аниқлаш мумкин?
Бунинг учун баланд пошнали туфлини кийиш керак. Сўнгра организмни бироз олдинга эгиш лозим. Агар бундай ҳаракат осон бўлса, унда пойабзал ноқулайлик туғдирмайди. Агар ҳаракатни такрорлаш қийин кечса ёки унинг амплитудаси жуда кичик бўлса, у ҳолда пойабзал кундалик кийиш учун мос келмайди.
Изоҳ (0)