Совуқ мавсумда кийимлар сони сезиларли даражада ошади ва образлар кўп қатламли ҳамда катта ҳажмли кийимлардан ташкил топади. Улар иссиқ ёки сифатли бўлишига қарамай, қоматни ўта семиз, бўйни эса паст кўрсатиши ҳам мумкин. Marie Claire ташқи кўринишга путур етказиши мумкин бўлган қишки кийимлар ҳақда сўз юритди.
Трикотаж кийимлар куз-қиш мавсумида гардеробнинг муҳим қисмидир. Аммо турли хил йирик нақшлар ва чизиқлар туширилган свитерлар ҳар қандай аёлни семиз кўрсатади. Бундан ўта озғин хонимлар хавотир олмаслиги мумкин. Аммо тўладан келган аёллар учун ҳақиқий муаммога айланади. Шунинг учун оверсайз свитерларни иложи борича суратларсиз, оддий кўринишдагисини сотиб олиш тавсия этилади.
Мўйнали иссиқ кийимлар анча олдин урфдан қолгани ҳисобга олинса, гардеробдан ҳам шунча аввал чиқариб ташланган бўлиши керак. Аммо аксарият аёллар ҳар йили қишки либос сифатида мўйнали кийимларга мурожаат қилади. У қўпол ва эскирган модель бўлишидан ташқари, жуда семиз ҳам қилиб кўрсатади. Бунинг ўрнига дублёнка курткалар оммалашди. Дубльёнкадан тикилган иссиқ кийимлар замонавийлиги ҳамда қоматни чиройли кўрсатиши билан бирга аёлларнинг севимли кийимига айланди.
Джинсилардан чарчаганлар кўпинча йирик чизиқли велвет шимларни танлайди. Тўғри, ушбу мато иссиқ, аммо қоматни унчалик ҳам чиройли кўрсатмайди. Қолаверса, қиш фаслида иссиқ офисда ишлайдиганлар учун ҳам тавсия этилмайди. Бунинг ўрнига чарм шимларга мурожаат қилиш мумкин. Чарм мато ҳашаматли кўриниши билан бирга, қоматдаги камчиликлар ҳам яширади.
Бахмал матоли кийимлар ҳам қоматидан ташвишланадиганлар учун тавсия этилмайди. Чунки бахмал матосидан тикилган шим, кўйлак ёки костюм бўлсин, айниқса, оч рангдагилари қоматни хунук кўрсатади. Қора ёки бошқа тўқ рангдаги бахмал либослар кўрсаткичи эса нисбатан камроқ. Шунинг учун қишки мавсум учун кийим харид қилганда, юқоридаги кийимлар қаторида бахмал либослардан ҳам воз кечиш тавсия этилади.
Изоҳ (0)