Криптовалюта брокери Genesis ўзининг кредит бўлими учун маблағ тўплашда қийналмоқда. Бу ҳақда масаладан хабардор одамларга таяниб Bloomberg хабар бермоқда.
Компания инвесторларни банкротлик тўғрисида ариза бериши мумкинлиги ҳақида огоҳлантирган.
Genesis сўнгги бир неча кун ичида камида 1 миллиард доллар янги капитал йиғишга ҳаракат қилмоқда, дейди манбалар.
Компания, хусусан, Binance крипто биржаси билан музокаралар олиб борган, аммо ҳали қўшимча сармоя олмаган.
Genesis FTX криптовалюта биржасининг қулаши натижасида юзага келган ликвидлик инқирозидан сўнг фаол равишда маблағ излай бошлади.
16 ноябрь куни брокер ўз платформасида пул ечиб олишни тўхтатди. Бунга унинг тўсатдан пул ечиб олишни бошлаган мижозларнинг талабларини қондира олмагани сабаб бўлган.
Бундан бироз олдин, Genesis ўзининг FTX савдо ҳисобида 175 миллион доллар блокланганлигини ошкор қилди.
Биз тез орада банкротлик тўғрисида ариза беришни режалаштирмаймиз. Мақсадимиз мавжуд вазиятни банкротлик тўғрисида ариза бермасдан ҳал қилишдир. Genesis кредиторлар билан конструктив музокаралар олиб боришда давом этмоқда, — деди компания вакили Bloomberg’га.
Bloomberg томонидан Genesis’нинг эҳтимолий банкротлиги ҳақидаги хабар эълон қилинган бир пайтда биткоин нархи икки йилдаги энг паст даражага тушиб, 15 480 долларга етди. 23 ноябрь куни энг йирик криптовалюта нархи 16,5 минг доллар атрофида шаклланмоқда.
2022 йил бошида 32 миллиард долларга баҳоланган FTX крипто алмашинуви ноябрь ойида банкрот бўлган эди.
Изоҳ (0)