Дунёнинг ҳар иккинчи аҳолиси доллар ўз етакчилигини йўқотишини кутмоқда

Дунё аҳолисининг деярли ярми (47 фоиз) доллар яқин 25 йил ичида дунёнинг етакчи валютаси мақомини йўқотишини кутмоқда. Бу ҳақда Gallup International’га таяниб, “РБК” хабар берди.

Дунё аҳолисининг учдан бир қисми бу содир бўлмаслигига амин, қолганлари эса олдиндан тахмин қилиш қийин, деб ҳисоблайди.

Gallup International халқаро ассоциациясига аъзо бўлган тадқиқот компаниялари томонидан 64 мамлакат фуқаролари ўртасида глобал сўров ўтказилди. Сўровнома дунёнинг энг йирик давлатлари, жумладан Ҳиндистон, АҚШ, Индонезия, Покистонда ўтказилди, бироқ Хитой унда иштирок этмади.

Долларнинг 25 йиллик истиқболдаги роли бўйича сўров биринчи марта ўтказилди, шунинг учун кайфиятдаги ўзгаришлар динамикасини кузатиш мумкин эмас.

Умуман олганда, тадқиқотчилар 2022 йил август—октябр ойларида турли мамлакатлардаги 60,7 минг киши ўртасида телефон, интернет орқали ва шахсан сўровнома ташкиллаштирди.

Сўров иштирокчиларидан қуйидаги саволга жавоб бериш сўралган: Сизнинг фикрингизча, яқин 25 йил ичида АҚШ доллари жаҳонда етакчи валюта бўлиб қоладими?

Келажакда доллар жаҳон устуворлигини йўқотиши мумкинлигига ишонадиганларнинг аксарияти Жануби-Шарқий Осиё, Яқин Шарқ ва Африка мамлакатларида яшайди.

Етакчилар Индонезия, Яман, Сурия, Афғонистон: бу ерда аҳолининг 60 фоизга яқини доллар гегемонлиги сақланиб қолишига ишонмайди.

АҚШнинг ўзида ҳам долларнинг қулашини кутаётганлар улуши жаҳондаги ўртача кўрсаткичдан кўпроқ бўлиб чиқди — 51 фоиз. Канада (54 фоиз) ва Мексикадаги (50 фоиз) тахминан яна шунча респондент шундай деб ҳисоблайди.

Дунёнинг баъзи йирик иқтисодиётлари долларга ишонишда давом этмоқда. Доллар етакчилигини йўқотишига ишонмаётганларнинг энг катта қисми Ҳиндистон, Жанубий Корея, Япония ва Германияда қайд этилган.

Социология фанлари доктори ва Ромир президенти Андрей Милехиннинг сўзларига кўра, олинган натижаларни жаҳон тартибидаги ҳақиқий тенденциялар билан изоҳлаш мумкин.

Дунёнинг ҳам географик, ҳам ижтимоий-иқтисодий жиҳатлар бўйича жадаллашиб бораётган сегментацияси шароитида давлатлар ва минтақаларнинг ўз иқтисодий ривожланиши учун жавобгарлиги кўриб чиқилмоқда. Бу тенденция иқтисодий ҳамкорликни қайта кўриб чиқишда ҳам ўз ифодасини топмоқда, — дея қайд этади у.

Аввалроқ доллар тақчиллиги туфайли жаҳон бозорлари инқирозга юз тутаётгани ҳақида хабар берилганди.