АҚШ Молия вазирлиги Алишер Усмоновга қарашли USM компанияси ва унинг бир қатор шўба корхоналарига қарши санкциялар киритган эди.
Мамлакат Хорижий активларни назорат қилиш бошқармаси (OFAC) қора рўйхатига бизнесмен ёки унинг компаниялари билан алоқадор бир неча киши ҳам киритилган.
Жами олти нафар Ўзбекистон фуқароси АҚШ ҳукуматининг санкциялар рўйхатидан жой олган. Улар орасида Усмоновнинг синглиси — Ўзбекистондаги машҳур шифокорлардан бири, акушер-гинеколог Саодат Нарзиева ҳам бор.
У айни пайтда Буюк Британияда ҳам санкциялар остида, бироқ Европа Иттифоқи унга нисбатан чекловларни 2022 йил сентябрида олиб ташлаган.
2022 йилнинг февралида Credit Suisse банкида Саодат Нарзиеванинг 2 млрд долларга яқин ҳисобрақамлари очилгани ҳақида хабар берилган эди.
Янгиланган қора рўйхатга Саодат Нарзиеванинг қизи Насиба Нарзиева ва унинг турмуш ўртоғи Шохрух Носирхўжаевлар ҳам киритилган.
Миллиардернинг яна бир синглиси Гулбаҳор Исмоилова ҳам санкцияга учраган шахслар рўйхатидан жой олган. Исмоилова Ўзбекистондан ташқари Россия ва Кипр фуқаролигига эга.
Шунингдек, АҚШ ҳукумати Алишер Усмоновнинг асраб олинган ўгли Натан Винерни ҳам қора рўйхатга киритган. У Москвада бир қатор компанияларга эгалик қилади ва Латвиядаги денгиз бўйида ҳашаматли кучмас мулки ҳам бор.
Гулноз Кўчарова эса АҚШ томонидан санкцияга учраган олтинчи ўзбекистонлик бўлди. У Усмоновнинг The Sister Trust компаниясига тегишли Кипрнинг Алменор компанияси директорлар кенгаши аъзоси ҳисобланади.
USM холдинг изоҳи
USM’нинг санкциялар бўйича вакили санкциялар қўллангани ҳақида “Дарё”га изоҳ берди.
“Биз АҚШ томонидан USM холдинги, унинг шўба корхоналари, уларнинг раҳбарияти, шунингдек, Алишер Усмонов ва бошқа акциядорларнинг қариндошларига нисбатан жорий этилган чекловларни адолатсиз ва асоссиз деб ҳисоблаймиз. Алоҳида таъкидлаб ўтамизки, рўйхатга қариндошларнинг киритилиши ахлоқсиз амалиёт, гаровга олишни эслатади. Ушбу чекловлар ноқонуний деб эътироз билдирилади”, — дея таъкидлади компания.
Изоҳ (0)