Қозоғистоннинг давлатга қарашли уран қазиб чиқарувчи корхонаси талаб ортиб бораётгани сабабли ишлаб чиқариш учун захираларни тайёрламоқда. Шарқий Европа эса бу борада Россияга қарамлигини камайтирмоқчи. Бу ҳақда Bloomberg хабар берди.
“Казатомпром” бош ижрочи директори Ержан Муканов олдин Россиядан бойитилган уран олган Шарқий Европадаги баъзи атом станциялари 2025 йилдан бошлаб компания билан шартнома тузмоқчилигини айтиб ўтди.
Унга кўра, геосиёсий ноаниқликлар ядро ёқилғиси оқимини ўзгартирмоқда, бу эса баъзи энергия ишлаб чиқарувчиларини захира йиғишга ундамоқда.
“Биз ишлаб чиқариш учун захираларни тайёрлаяпмиз, шунинг учун бозор талабларига жавоб бера оламиз, — деди Муканов.
АҚШ ҳам дунёдаги энг йирик ядро ёқилғиси етказиб берувчиси — Россиядан бойитилган уранга қарамликни камайтиришга интилаётган давлатлар қаторида.
Ҳозирча бу Россиянинг Украинадаги уруши ортидан ядро экспортининг ўсишига тўсқинлик қилиш учун етарли бўлмади, мамлакат даромадларини ошириб, бутун дунё бўйлаб янги харидорларга таъсирини кучайтирди.
Жаҳон Ядро Ассоциацияси ўтган йили реактор қувватининг 16 фоизга ошганини назарда тутиб, уранга бўлган талаб 2030 йилга бориб учдан бир қисмга ўсишини таъкидлади.
Дунёдаги ураннинг 40 фоиздан ортиғини ишлаб чиқарадиган Қозоғистон бу йил ишлаб чиқаришни 22 минг тоннага яқин даражада ушлаб туришни режалаштирмоқда.
“Биз уранга бўлган талабнинг ошишини прогноз қиляпмиз, аммо нархларнинг кескин ўсишидан манфаатдор эмасмиз”, — деди Муканов.
“Казатомпром” бу йил учинчи экспорт йўлини очишни режалаштирмоқда — уран Хитой портларидан бири орқали жўнатилади. Айни пайтда компания атом ёқилғисини Россия ва Каспий денгизи орқали Қора денгизга жўнатади.
Мукановга кўра, янги атом электр станцияларини юклаш ва ўз захираларини ошириш учун уран излаётган Хитойдан талаб ортиб бормоқда. Пекиннинг мақсади “узлуксиз узоқ муддатли таъминот” га эга бўлишдир.
Изоҳ (0)