“Толибон” ҳаракати Ҳирот вилоятидаги ҳайдовчиларга бурқасиз аёлларни машиналарига ўтқазишни тақиқлади. Бу ҳақда Hasht-e Subh Daily хабар берди.
Маълум қилинишича, вилоятдаги ҳайдовчилар бурқасиз аёлларга хизмат қилмаслик ҳақида огоҳлантирилган. Сўнгги уч кун давомида Ҳирот вилоятидаги бир қатор чорраҳаларда “Толибон” ҳаракати аъзолари бурқа киймаган аёлларни машинадан туширган.
Аввалроқ ижтимоий тармоқда аёл ҳайдовчига хизмат кўрсатаётгани учун ҳайдовчига “Толибон” аъзоси тарсаки туширгани видеоси эълон қилинганди.
[telegram_yembed_post link="https://t.me/daryo_live/80514"]
2022 йил “Толибон” ҳаракатининг олий раҳбари Ҳайбатулла Оҳундзода Афғонистонда аёлларнинг юз ва танани тўлиқ ёпадиган паранжи (бурқа)сиз кўчага чиқишини тақиқловчи фармонни имзолаганди.
Фармонда аёлларнинг кўчада муҳим иши бўлмаса, уйда ўтиргани маъқул экани ҳам қайд этилган.
Паранжи кийишдан бош тортганлик учун жазо бор. Агар аёл кўчага биринчи марта юзи очиқ ҳолда чиқса, унинг уйига “Толибон” вакиллари келиб, турмуш ўртоғи, ака-укаси ёки отаси билан профилактик суҳбат ўтказади. Иккинчи сафар аёлнинг хатти-ҳаракати учун масъул бўлган эркак тушунтириш учун вазирликка чақирилади. Агар бу ҳол учинчи марта содир бўлса, эркак васий судланади ва уч кунга қамалади.
Афғонистонда аёлларга нисбатан қўлланган тақиқлар
“Толибон” 2021 йил августида ҳокимиятни қўлга киритганидан буён аёллар ва қизларга оид турли тақиқлар жорий этилган.
Бунгача афғонистонлик аёлларнинг БМТ идораларида ишлаши, эркакларга аёллар учун кийим тикиш, аёлларнинг эркак шифокорларга бориши, аёлларнинг университет ва мактабда таълим олиши, аёлларнинг шифохонага ёлғиз бориши ва уларнинг истироҳат боғига ташриф буюриши тақиқлаган. Шунингдек, Афғонистонда оилалар ва аёлларнинг боғлари ёки яшил ҳудудлари бўлган ресторанларга кириши ва аёллар овози эшитилган рекламаларни эфирга узатиш тақиқланган.
Изоҳ (0)