Европа тикланиш ва тараққиёт банки Самарқанд шаҳрига 100 та электробус, қувватлаш ускуналари сотиб олиш ва керакли инфратузилмани яратиш учун 49 миллион АҚШ доллари миқдорида узоқ муддатли суверен кредит ажратади.
Шунингдек, Самарқанд банкнинг “Яшил шаҳарлар” дастурига қўшилган мамлакатдаги биринчи шаҳар бўлади.
Маблағлар 100 тагача ўрта сиғимли (10,5 м) зарядловчи қурилмалари ўрнатилган электробуслар харид қилиш, шунингдек, зарур инфратузилмани, жумладан, электроавтобус депоси, электр подстанцияси, маъмурий бинолар, эксплуатация ва техник хизмат кўрсатиш иншоотларини яратишга йўналтирилади.
Бу Самарқанд Яшил шаҳар Ҳаракатлар режаси (GCAP) доирасидаги биринчи лойиҳа саналади. ЕТТБ ва шаҳар томонидан биргаликда ишлаб чиқилган GCAP (Greeн City Action Plan) шовқин, ҳаво ифлосланишини, жумладан CО2 ва бошқа эмиссиялар чиқарилишини камайтиришга ёрдам беради. Дастур маҳаллий жамоатчиликнинг фикр ва ғояларини ҳам инобатга олади.
ЕТТБнинг қайд этишича, GCAP’нинг ишга туширилиши ва экологик тоза шаҳар транспортининг жорий этилиши Самарқанд шаҳри учун жуда муҳим. Шаҳарнинг чегаралари кенгайиши ҳисобига яқин йилларда унинг аҳолиси икки баробар ортиши кутилмоқда.
Шаҳар, шунингдек, тобора оммалашиб бораётган сайёҳлик масканига айланяпти ва унинг тор кўчалари, UNESCО томонидан қўриқланадиган тарихий ҳудудлар атрофидаги оғир тирбандликларни яхшироқ бошқариш учун замонавий транспорт ечимлари керак.
Изоҳ (0)