“Дарё”нинг YouTube’даги каналида халқаро тоифадаги цирк артисти ва бугунги кунда вайнлари билан ижтимоий тармоқ фойдаланувчиларига яхши таниш бўлган Шерзод Мамадалиев билан интервью уюштирилди. У тасодифан цирк артисти бўлгани, от минишни билмай Хитой циркига чавандоз сифатида ишга кетгани ва оғир дардни бошдан кечиргани ҳақида сўзлаб берди.
— Оиламиз санъатга яқин, аммо ҳеч ким цирк соҳасида фаолият юритмаган. Мактабни битириб, актёр бўлиш умидида дадам билан эстрада ва цирк коллежига ҳужжат топширгани борганмиз. Ўшанда маҳоратли чавандоз Карима Зарипова “Ўғлингизнинг жуссаси кичкина экан. Агар актёрлик бўйича ўқиса, уни ролларга олмаслиги мумкин. Чаққон бола экан, ўзини акробатликда синаб кўрсин”, деб маслаҳат берган. “Нима, мен циркда масхарабоз бўламанми?” деб эътироз билдирганман. Аммо коллеждаги кичик цирк залида шуғулланаётган бўлажак артистларга қараб, ҳавасим келган. Ҳозир ўйлаб қарасам, аввалдан менда цирк санъатига қизиқиш юқори бўлган. Чунки болалигимдан ёғоч оёқда юришни яхши кўрардим. Аммо коллеж ҳаётига мослашишим осон кечмаган. Баландликдан қўрқмасдим, аммо ингичка арқонга осилиб, ҳавода мураккаб трюклар бажариш осон эмас. Иккинчи курсдан бошлаб, циркда ишлашни бошлаганман. Чунки цирк санъатида кўп нарса амалиётда ўргатилади. Назарий билим олган билан уни амалга қўллай олмаса, қийин, — дейди Шерзод Мамадалиев.
Шерзод Мамадалиев чавандозликни билмай туриб, Хитой циркига ишлагани кетгани ва у ердаги ҳаёти ҳақида сўзлаб берди.
— Танишларимдан бири Хитой циркига чавандоз кераклиги ва ойига 1000 доллардан маош тўлашлари ҳақида айтиб қолди. “Мен бораман”, дедим-у, аммо ўша кунга қадар отнинг эгарини ҳам ушламаганим ҳақида ўйламадим. Тошкентдан тўртта бола ишлагани бордик. Иккита чавандоз йигит отда ҳаракатланиши, мен эса уларни боғловчи “кўприк” бўлишим керак эди. Бу ниҳоятда хавфли томоша ҳисобланади. Самолётда кетаётганда йигитларга “Мен от минишни билмайман, ўргатарсизлар”, десам улар бир-бирига қараб “Биз ҳам билмаймиз”, деб кулишган. Ҳаётда таваккалчи инсонман, бунинг устига ўша пайтда уйланишим учун пул тўплашим керак эди. Хитойга бордик ва ҳеч биримиз отга яқинлашолмаганимизни кўриб хитойликларнинг жаҳли чиқди. “Бир ойда ўрганамиз”, деган ваъда билан ишга кирдик. Бир неча марта йиқилдик, от судраб кетган пайтлар ҳам бўлди. Аммо сўзимизнинг устидан чиқиб, зўр томошалар қўйдик, — дейди Шерзод Мамадалиев.
Ижодкор Хитойда ишлаб юрган кезлари бошига оғир мусибат тушгани, шифокорлар ўлади деб ташхис қўйишгани ҳақида сўзлаб берди.
— Хитойда ишлаб юрган пайтимда бирдан тобим қочди. Иштаҳам бўлмай, ҳолсизлана бошладим. Ҳушимдан кетиб йиқилганимдан сўнг касалхонага олиб боришган. Орқа миямдаги оғриқ сабаб умуман овозлар ёқмасди. Додлаб жазавага тушиб қолардим. Касалликнинг аниқ сабабини қўйишолмаган. Кимдир ҳашарот чаққан деди, бошқа шифокор эса минингит ташхисини қўйган. Касал бўлмасимдан аввал тақиқланган ерда балиқ тутгандим. Ўшанда қармоғимга балиқ эмас, илон тушган ва уни чиқараётганимда бармоғимни тишлаб олганди. Аммо бунга эътибор бериб, муолажа ҳам қилмагандим. Ўшанда қонга вирус тушган бўлиши ҳам мумкин.
Касаллигим жуда оғир кечган. Оғзим ва қўлларим қийшайиб, ўзимни идора қилолмайдиган аҳволга тушганман. Умуман кўзимга уйқу илинмасди, фақат калима қайтариб ўтирардим. Ўша пайтда ота-онам ҳақида жуда кўп ўйладим. Соппа-соғ мусофирчиликка кетиб, уйимга ўлигим борадими деб кўп ўйлардим. Урумчидан бир нечта муллаларни олиб келиб, ўқитишган. Улар “Тақдир, пешанасида ёзилгани бўлади”, дерди. Хонадош йигитларга васият қилиб, ота-онамга гапларимни етказиб қўйишларини сўрардим. Муолажалардан самара бўлмагач, хитойлик шифокорлар “Яқинда ишлагани келган экан, бунинг пули ҳам йўқ. Яхшиси, битта укол қилиб, уйига жўнатиб юборамиз. Самолётдан тушиши билан ўлади”, дейишган экан. Ўзбек акаларга минг раҳмат, улар ёрдам қилиб даволатишган. Соғайганимдан кейин бўлган воқеаларни айтиб беришганда ҳаётнинг нақадар қадрли эканлигини англаб етдим, — дейди Шерзод Мамадалиев.
Аммо бу қаҳрамонимизнинг илк фожиаси эмас. У цирк томошаси пайтида арқондан йиқилгани, ногирон бўлиб қолган ҳамкасби ва ўзидаги ноёб қобилиятни қачон сезгани ҳақида ҳам сўзлаб берди.
Қуйида суҳбатни тўлиқ томоша қилишингиз мумкин.
Изоҳ (0)