Қашқадарё вилоятининг Косон туманида яшовчи 14 ёшли қиз отаси томонидан аёвсиз калтаклангани ҳақида хабар берилган эди. Вилоят суди ахборот хизмати раҳбарининг “Дарё”га маълум қилишича, мазкур отага нисбатан ҳукм ўқилди.
Унга кўра, жиноят ишлари бўйича Косон туман судида Р.Т. (1978 йилда Қашқадарё вилоятида туғилган, ишсиз, муқаддам судланган)га оид жиноят ишини кўриб чиқиш бўйича очиқ суд жараёни якунланиб, суд ҳукми эълон қилинди. Р.Т. охирги бир йил давомида муттасил равишда ўзининг 2009 йилда туғилган вояга етмаган қизини ҳар хил сўзлар билан ҳақоратлаб, уриб-дўппослаб, қийнаб келган.
Суд ҳукмига мувофиқ Р.Т. Жиноят кодексининг 110-моддаси (қийнаш) 2-қисми “а” бандида назарда тутилган жиноятни содир этганликда айбли деб топилиб, унга 3 йил муддатга озодликдан маҳрум қилиш жазоси тайинланди.
Қайд этилишича, ушбу ҳукмдан норози тарафлар қонунда белгиланган тартиб ва муддатда Қашқадарё вилоят судининг апелляция инстанциясига шикоят бериш ва протест келтириш мумкин.
Косон тумани ҳокимлигининг маълумот беришича, ўша куни воқеадан маҳалла ходимлари, туман ҳокимлиги, оила ва хотин-қизлар бўлими хабар топиб, туман ички ишлар органларига отанинг ҳаракати бўйича хабар берилган.
“Ўша куниёқ экспертиза тайинланиб, ҳозирги кунда хулосалари кўриб чиқилмоқда”, — дейди ҳокимлик ахборот хизмати раҳбари Дилшод Набиев.
Ҳокимликнинг аниқлаштиришича, калтакланган қиз отанинг бошқа турмушидан туғилган фарзанди бўлиб, видеодаги она унинг ўгай онаси бўлган.
“Оила ва хотин-қизлар бўлими томонидан туман ҳокимлиги болаларни ҳимоя қилиш шўбаси масъуллари жалб қилиниб, боланинг ҳуқуқини ҳар томонлама қўллаб-қувватлаш борасида тегишли кўрсатмалар берилган. Шунингдек, ота-она билан ҳам алоҳида суҳбат ўтказилиб, тушунтириш ишлари олиб борилди. Ҳозирги кунда қиз маҳалла қарамоғига олинган ҳамда унинг хавфсизлиги таъминланган. Бугунги кунда боланинг ва отанинг розилиги асосида унинг васийликка берилиш масаласи кўриб чиқилмоқда”, — дейилади ҳокимлик ахборотида.
Изоҳ (0)