Original taklifnoma, maxsus dress kod, sochilgan dollarlar: Munisa Rizayevaning 200 millionlik klipi taqdim etildi (video)

Xonanda Munisa Rizayeva AQSh safaridan qaytgan kuniyoq Toshkentdagi Hilton mehmonxonasida “Bobo” qo‘shig‘iga ishlangan klip premyerasini o‘tkazdi. Xonanda “Daryo” jamoasiga ham tilla tuxumcha ichidagi noodatiy taklifnoma yubordi. Ko‘plab shou-biznes vakillari tashrif buyurib, xonandani yangi ijod mahsuli bilan qutlashdi.

Xonanda premyeraning dress kodi tilla rangda bo‘lishi haqida aytib o‘tgandi. Shunga monand mehmonxonaning maxsus yo‘lagi ham tilla rangga burkangan. Tilla rangli ulkan tuxum esa barcha mehmonlarning eʼtiborini tortdi.

— “Bobo” qo‘shig‘i asli folkor janrga mansub bo‘lib, uzoq yillik tarixga ega. Uni kuylash taklifini berishganda, menga maʼqul bo‘ldi. Klip g‘oyasi ustida ancha ishlandi. Uni yaratishda katta jamoa mehnat qildi. 

Qo‘shiqni o‘zbek, rus va tojik tillarida ijro etdik. Yaqin orada Tojikistonga gostrol safarini uyushtirmoqchimiz. “Bobo”ning tojik tilidagi varianti ham o‘sha yerdagi muxlislar uchun ajoyib tuhfa bo‘ladi, deb hisoblayman, — deydi xonanda.

Xonanda taqdimotda shunchaki klip namoyishini o‘tkazmadi. Premyeradan so‘ng qo‘shiqni ijro etib, bir guruh raqs ustalari bilan birga raqsga tushdi.

Munisa Rizayeva faqatgina shu sovg‘a bilan kifoyalangani yo‘q. U tuxum shaklidagi ulkan tort bilan barcha mehmonlarni siyladi.

— Munisa Rizayeva bilan 12 yil avval bir filmda suratga tushganmiz. Har doim orginallikka intiladigan ijodkor. Dizayner bo‘lganim uchun avval liboslariga eʼtibor beraman. Hamisha noodatiylikka intiladi, — deydi aktrisa Shahzoda Muhammedova.

— Dugonamning g‘ayratiga tan berish kerak. Qo‘shiq ham xuddi u uchun yozilgandek bo‘libdi. Yoshlarga maʼqul keladi. Klip esa orginal, ancha-muncha inson mehnat qilgani ko‘rinib turibdi, — deydi komik aktrisa Shahlo Zoirova.

Yorqinxo‘ja Umarovning taxminiga ko‘ra, klip uchun 20 000 AQSh dollari miqdorida mablag‘ sarflangan. Chunki klipda malakali grafika ustalari mehnatidan keng foydalanilgan. 

Yulduzli taqdimot qanday o‘tganini bilishni istasangiz, “Daryo”ning YouTube’dagi kanaliga kirib, maxsus reportajni tomosha qilishingiz mumkin.