Germaniya Qurolli kuchlari rahbari Ukraina haqidagi gapi sababli ishdan olinadi
Germaniya mudofaa vaziri Boris Pistorius Bundesver bosh inspektori Eberxard Zornni ishdan bo‘shatmoqchi. Bu haqda Spiegel xabar berdi.
Ma’lum qilinishicha, 2018-yildan buyon bu lavozimda ishlab kelayotgan Zorn o‘rniga general-mayor Karsten Breyer tayinlanadi. AFP’ning aniqlik kiritishicha, Zornning iste’fosi payshanba kuni bo‘lib o‘tadi. U 2022-yilning sentabrida Ukraina Qurolli kuchlari Rossiya qo‘shinlariga samarali qarshilik ko‘rsata olishiga shubha bildirgandi.
Xususan, Zorn Focus jurnaliga bergan intervyusida Ukraina qarshi hujumlar uyushtirayotgani, biroq Rossiyani orqaga qaytara olmasligini aytgan. U Rossiya armiyasi Moldovada, Kaliningrad yaqinida, Finlyandiya chegarasida yoki Gruziyada ikkinchi front ochishi mumkinligini ta’kidlagan.
Yaqinda Bundesverning bosh inspektori bo‘lishi kutilayotgan 59 yoshli Karsten Breyer 2021-yilning noyabridan 2022-yilning mayigacha hukumatning koronavirus pandemiyasiga qarshi kurash komissiyasini boshqargan.
