“Rossiya allaqachon mag‘lub bo‘lgan”: Ukraina mudofa vaziri frontdagi vaziyat haqida gapirdi
Rossiya harbiylari Ukraina Qurolli kuchlarining qarshi hujumiga tayyorgarlik ko‘rishni boshladi: ular xandaqlar qazimoqda va istehkomlar qurmoqda. Bu haqda Ukraina mudofaa vaziri Aleksiy Reznikov xabar berdi.
“Rossiya harbiylari frontdagi vaziyatdan juda yaxshi saboq oldi, shuning uchun ular himoyaga o‘tdi. Ular allaqachon xandaqlar va istehkomlar qazimoqda. Aytgancha, Qrimda ham shunday jarayon kechmoqda”, — dedi Reznikov.
Uning fikricha, Rossiya Qurolli kuchlari 2022-yilda Ukraina harbiylarining Xarkov va Xerson yo‘nalishidagi hujumi paytidagi mag‘lubiyatlaridan ma’lum xulosalar chiqargan. Vazirlik rahbari Rossiyaning bunday faolligini Ukraina harbiylari uchun yaxshi belgi deb ta’rifladi.
“Bu Rossiya Qurolli kuchlari Ukraina harbiylarining qarshi hujumiga ishonishini va bunga jiddiy yondashishini anglatadi”, — deydi vazir. Shuningdek, Reznikov bu voqea Rossiyaning urushdagi mag‘lubiyatidan dalolat berishini qayd etdi.
“Bosqinchilarning harbiy maqsadlari dastlab hujum, bir necha kun ichida esa Kiyevni egallab olishdan iborat edi, keyin faol mudofaaga o‘tishga o‘zgardi. Ular allaqachon yutqazdi. Bu qadam urushda mag‘lub bo‘lishni anglatadi”, — deydi u.
