Qirg‘izistonda terrorchilik tashkilotiga a’zolikda gumonlanib, ikki o‘zbekistonlik hibsga olindi
Qirg‘iziston Milliy xavfsizlik davlat qo‘mitasi O‘sh viloyati boshqarmasi tomonidan 17-aprel kuni o‘tkazilgan tadbirda ikki nafar O‘zbekiston fuqarosi qo‘lga olindi. Bu haqda qo‘mita matbuot xizmati xabar berdi.
Qayd etilishicha, ular O‘zbekiston hududida taqiqda bo‘lgan “Tavhid va jihod katibasi” terrorchilik tashkilotining Istanbul bo‘linmasiga aʼzolikda gumonlanmoqda.
Maʼlumotga ko‘ra, M.Z. hamda M.F. Qirg‘izistonga noqonuniy yo‘llar orqali kirib kelgan va soxta hujjatlar tayyorlatib, mamlakatdan chiqib ketishni rejalashtirgan. Hozirda mazkur holat yuzasidan tergov harakatlari olib borilmoqda.
Fevral boshlarida Interpolning O‘zbekistondagi Milliy markaziy byurosi xodimlari boshchiligida diniy-ekstremistik faoliyatga aloqadorligi uchun qidirilayotgan jinoyatchi Kishinyov shahridan Toshkentga yetkazilgandi. Shuningdek, Namanganda Telegram orqali ekstremistik g‘oyalarni targ‘ib qilgan shaxsga jinoyat ishi qo‘zg‘atilgani, Farg‘onadan turib Suriyadagi terroristik tashkilotni moliyalashtirmoqchi bo‘lgan shaxslar ozodlikdan mahrum etilgani to‘g‘risida xabar berilgandi.
