Tojik-afg‘on chegarasida terrorchilikda gumonlangan ikki kishi otib o‘ldirildi

26-aprel kuni ertalab Tojikiston xavfsizlik kuchlari Afg‘onistondan Tojikistonga noqonuniy o‘tmoqchi bo‘lgan ikki qurolli jangarini otib o‘ldirdi. Milliy xavfsizlik davlat qo‘mitasi (MXDQ) maʼlumotlariga ko‘ra, halok bo‘lganlar Tojikiston hududida terakt uyushtirishni rejalashtirgan, deb yozadi “Xovar” nashri huquq-tartibot idorasi matbuot xizmati bayonotiga tayanib.

Hodisa Tog‘li Badaxshon avtonom viloyati Vanch tumani Dashti Yazg‘ulom qishlog‘idagi “Darvaz” chegara otryadiga qarashli 11-uchastka qo‘riqlash hududida sodir bo‘lgan.

“Respublika huquq-tartibot idoralari tomonidan o‘tkazilgan qo‘shma aksilterror operatsiyasi natijasida terrorchilar zararsizlantirildi”, — deyiladi MXDQ matbuot xizmati xabarida.

Voqea joyida 2 ta Kalashnikov avtomati, 2 ta xorijda ishlab chiqarilgan to‘pponcha, 8 ta qo‘l granatasi, 12 ta patronli o‘qdon, 19 o‘ram portlovchi modda, 2 ta maxsus aloqa uskunasi va halok bo‘lganlarga tegishli 2 ta uyali telefon topilib, musodara qilingan.

Mazkur holat yuzasidan jinoyat ishi qo‘zg‘atilib, terrorchilar va jinoyatning boshqa sheriklarini to‘liq aniqlash maqsadida tezkor-qidiruv va tergov tadbirlari olib borilmoqda.

Aksilterror operatsiyasi davomida huquq-tartibot idoralari xodimlari va tinch aholi vakillari jabrlanmagan, deya taʼkidladi Tojikiston Milliy xavfsizlik davlat qo‘mitasi.