Hilola Umarova Surxondaryoda hokimdan adolat talab qilgani uchun qamalgan maktab direktori bilan telefonda gaplashdi (video)
Surxondaryo viloyati hokimi Ulug‘bek Qosimov yig‘ilishida undan adolat talab qilib, o‘ziga nisbatan nohaqlik bo‘lganini aytgan maktab direktori yig‘ilishdan olib chiqib ketilib, qamoqqa olingani haqida xabar berilgan edi. Maktabgacha va maktab taʼlimi vaziri Hilola Umarova mazkur direktor bilan telefon orqali gaplashdi.
Maktab direktori 7 kunlik qamoqdan keyin hozir o‘z uyida ekanligini maʼlum qilgan. Vazir Surxondaryoga borganida ushbu maktab bilan bog‘liq holatni batafsil o‘rganilishini aytib o‘tdi. Shuningdek, pedagoglar davlat himoyasida ekanini ta’kidladi.
“Sizga telefon orqali tusha olmay oldingizga odam jo‘natdim. Ozgina xavotir olgandim. Yana qamalib qoldi, degan ma’lumotlar kelganiga o‘zim yana aloqaga chiqay, dedim. Ovozingizni eshitganimdan juda ham xursandman. O‘zim safarda edim, ilojim yo‘q odam jo‘natdim. Ahvolingiz yaxshimi? Hammasi nazoratda, har bir pedagog xodim davlatimiz himoyasida. Sizning ortingizda davlatimiz rahbari turibdi. Surxondaryoga yana borganimda alohida uchrashib, bafurja gaplashamiz. Uyda bo‘lganingizdan xursandman, sog‘-salomat bo‘ling. Umuman xavotir olmang, hammasi nazoratda, davlat himoyasidasiz”, — deydi vazir.
Direktor ham o‘z minnatdorligini aytib, hozirda xavotirda ekanini bildirgan. Biroq vazir hammasi nazoratda ekanini ta’kidlagan.
“Ertaga nima bo‘larkan, tinch qo‘yisharmikan, deb o‘ylayapman”, — deydi direktor.
Tarmoqlarda tarqalgan videoda Surxondaryo viloyati hokimi Ulug‘bek Qosimov Sariosiyo tumanidagi maktab direktori Umida Tursunova bilan tortishgani aks etgan.
Surxondaryo viloyati hokimligi axborot xizmati rahbar Murodbek Davlatovning “Daryo”ga bildirishicha, tortishuv 26-iyul kuni Sariosiyo tumanidagi 12-sonli umumiy o‘rta taʼlim maktabida sodir bo‘lgan.
Viloyat hokimi Umida Tursunovaga lavozimidan olinganini aytgach, direktor “mening nima aybim bor?” deb so‘raydi. “Eplolmaganing uchun, butun dunyoga sharmanda qilganing uchun”, deya javob bergan viloyat hokimi.
U yerda nima bo‘lganini siz qayerdan bilasiz? “Muhitni buzding”, deysiz, nima muhit buzilgan u yerda? Maktabning tomorqasigacha sotib yuborishyapti, shuncha yozganimizga indamaylik deb... Ahvolni o‘rganadigan odam yo‘q, bularning hammasining tili bir, — deydi Umida Tursunova viloyat hokimining dakkisi noo‘rin ekanini taʼkidlar ekan.
Voqea davomida maktab direktori “Viloyat hokimiga to‘g‘ri maʼlumot kiritilishi kerak. Yo‘qot, yo‘qot, yo‘qot, nima qilyapman men? Senlar maktabda xohlagan ishingni qilding, hech kim hech narsa qilmadi-ku?! Menga chora ko‘riladimi? Nimaga tashqariga chiqaman? Mana shu yerda turib oxirigacha eshitaman, prezidentga aytadigan gapim bor. Otsa, meni O‘zbekiston oldiga olib chiqib, otib tashlasin”, — deydi. Shundan so‘ng direktor ichki ishlar organi xodimlari tomonidan majlislar zalidan olib chiqib ketilgan.
Majlislar zalini tark etayotgan Umida Tursunova viloyat hokimi Ulug‘bek Qosimovga qarata “Hayf sizday viloyat hokimiga”, deydi.
Murodbek Davlatovning qo‘shimcha qilishicha, Umida Tursunova dastlab o‘qituvchilarga qo‘pol muomalasi sabab jamoatchilik nazariga tushgan. Shuningdek, u maktabga murojaatni o‘rganishga borgan jurnalistlarning kamerasiga shikast yetkazgan.
