Xorazm viloyati IIBga yangi boshliq tayinlandi
Ichki ishlar vazirining buyrug‘i bilan polkovnik Ravshan Sultonxo‘jayev Xorazm viloyati IIB boshlig‘i lavozimiga tayinlandi. Bu haqda IIV matbuot xizmati xabar berdi.
Tayinlovga qadar Ravshan Sultonxo‘jayev Toshkent shahar Ichki ishlar bosh boshqarmasi boshlig‘i o‘rinbosari — Huquqbuzarliklar profilaktikasi boshqarmasi boshlig‘i lavozimida xizmat qilgan.
Xorazm viloyati IIBga rahbarlik qilib kelgan general-mayor Davron Nazarmuhamedov ichki ishlar vaziri o‘rinbosari — Maʼnaviy-maʼrifiy ishlar va kadrlar bilan taʼminlash departamenti boshlig‘i lavozimiga tayinlangan edi.
Iyul oxirlarida Farg‘onada prezident boshchiligida bo‘lib o‘tgan yig‘ilishda faoliyatida yo‘l qo‘ygan kamchiliklar uchun Farg‘ona viloyati ichki ishlar boshqarmasi boshlig‘i Muhiddin Jo‘rayev lavozimidan ozod etilgandi. Uning o‘rniga ichki ishlar vaziri o‘rinbosari general-mayor Azizbek Ikramov Farg‘ona viloyati ichki ishlar boshqarmasi boshlig‘i etib tayinlangan.
Avgust oyi boshida esa Nukus shahar bo‘yicha ichki ishlar organlari faoliyati muvofiqlashtirish boshqarmasi boshlig‘i lavozimida ishlagan Ziyauatdin Zaytov Nukus tumani hokimi lavozimiga tasdiqlangan edi.
