Toshkentda Yutong yo‘lovchi avtobusi tutab ketdi
“Toshshahartransxizmat” Toshkent shahridagi avtobuslardan biri tutab ketgani aytilgan xabarlar yuzasidan ma’lumot berdi.
Ma’lum qilinishicha, 25-avgust kuni 18-avtobus saroyi filialiga biriktirilgan Yutong rusumli avtobusda tutun hosil bo‘lgan.
18-avtobus saroyi filiali tasarrufidagi “Chorsu” savdo markazi—Chinni bozor yo‘nalishida qatnovchi 147-sonli avtobusning sovitish tizimi (konditsioner) kompressoridagi nosozlik tufayli sovitish tizimi tasmasi ishqalanishi hisobiga tutun hosil bo‘lgan.
Mazkur hodisa avtobus haydovchisi tomonidan darhol aniqlanib, nosozlikni bartarf etish maqsadida avtobusni 18-avtobus saroyi filialiga olib borgan. Hodisa oqibatida yo‘lovchilarga va atrofdagilarga zarar yetmagan.
Hozirda ushbu avtobus 18-avtobus saroyi filialiga olib kelingan bo‘lib, Yutong kompaniyasining texnik xodimlari tomonidan avtobus nosozligi bartaraf etilgan.
“Avtobus soz holatga keltirilgan hamda 26-avgust kunidan ushbu yo‘nalishda xizmat ko‘rsatishni davom ettiradi”, — deyiladi xabarda.
Bundan oldin poytaxtda elektrobus bilan bog‘liq bir nechta yo‘l-transport hodisalari qayd etilgandi. Xususan, 8-iyun kuni Uchtepa tumanida yo‘lovchi elektrobusi va Lacetti to‘qnashib ketgan, 5-iyunda esa Yakkasaroy tumani Shota Rustaveli—Glinka ko‘chalari kesishgan chorrahada Lacetti, Malibu-2 va Yutong rusumli elektrobus ishtirokida ham YTH yuz bergan edi.
