AQSH prezidentligiga nomzod Rossiyadan sanksiyalarni olib tashlashga tayyorligini bildirdi

Respublikachilar partiyasidan AQSH prezidentligiga nomzodini qo‘ygan tadbirkor Vivek Ramasvami sanksiyalar masalasida Rossiyaga yon berishga tayyor. Bu haqda biznesmen The American Conservative jurnalida chop etilgan maqolasida yozdi. 

 

 

“Men sanksiyalarni bekor qilaman va Rossiyani jahon bozoriga qaytaraman”, — deydi Ramasvami.

Bundan tashqari, u “Rossiyaning Xitoy bilan harbiy ittifoqdan chiqishi evaziga” Ukrainaning okkupatsiya qilingan hududlari ustidan “Rossiya nazoratini qabul qilishga” va Ukrainaning NATO a’zoligiga nomzodini bloklashga va’da bermoqda. 

Ramasvami: “Xitoy — Ukrainadagi urushning yagona g‘olibi”

Rossiyaning Ukrainaga qarshi bir yarim yillik urushidan so‘ng, Xitoy bu vaziyatda yagona g‘olib ekani tobora oydinlashmoqda, deb hisoblaydi tadbirkor. Ramasvami Ukrainada tinchlikni yagona shart bilan — “Amerika manfaatlarini birinchi o‘ringa qo‘yadigan” sharoitda ta’minlash niyatida. 

AQSH prezidenti Jo Bayden ma’muriyati Xitoy rahbari Si Szinpinni Rossiya prezidenti Vladimir Putindan uzoqlashishga majburlash borasida “ahmoqona harakat qildi”, deb ta’kidlaydi tadbirkor.

“Aslida, biz Putinni Sidan uzoqlashishga majburlashimiz kerak”,— deya qo‘shimcha qilgan u. 

AQSHda prezidentlik saylovi 2024-yilning noyabriga belgilangan. Ramasvamidan tashqari sobiq prezident Donald Tramp, sobiq vitse-prezident Mayk Pens, Florida gubernatori Ron Desantis, Janubiy Karolina sobiq gubernatori Nikki Xeyli, Janubiy Karolinadan senator Tim Skott, Arkanzas sobiq gubernatori Asa Xatchinson va Shimoliy Dakota gubernatori Dug Bergum poygada ishtirok etishini e’lon qilgan.