Farg‘onadagi zapravka 5 mlrd so‘mlik gazdan noqonuniy foydalangani aniqlandi
Farg‘ona viloyati Oltiariq tumanidagi zapravka 5 milliard 542 million so‘mlik yoki 27 ming 700 ta xonadonning bir oylik iste’moliga teng hajmdagi tabiiy gazdan noqonuniy foydalangani aniqlandi.
Holat Energetika vazirligi huzuridagi “O‘zenergoinspeksiya” tomonidan Bosh prokuratura va “Hududgazta’minot” AJ xodimlari bilan hamkorlikda Farg‘ona viloyatida o‘tkazilgan nazorat tadbirlarida aniqlandi. Xususan, ushbu MCHJga qarashli 46-sonli AGTKSHda gaz sarfini o‘lchash kompleksiga o‘rnatilgan “toraytiruvchi” qurilmaning kirish-chiqish qismidagi gaz jo‘mraklariga davlatlararo standart talablari (GOST 8.586-2005)ga zid ravishda “prokladka” o‘rnatilgani ma’lum bo‘ldi.
Mazkur noqonuniy holat natijasida davlat manfaatlariga yetkazilgan zarar miqdori 5 milliard 542 million so‘m (5 million 542 ming metr kub)ni tashkil etgan. Aniqlangan holat yuzasidan rasmiylashtirilgan hujjatlar belgilangan tartibda huquqni muhofaza etuvchi organlarga taqdim qilindi.
Ma’lumot uchun: ushbu hajmdagi tabiiy gaz 27 ming 700 ta xonadonning bir oylik iste’moliga teng.
