O‘zbekistonda noturar joyni rasmiylashtirishdan avval yashovchilarni ro‘yxatdan chiqarish talab etiladi

“Fuqarolarni ro‘yxatga qo‘yish tartibini takomillashtirish munosabati bilan O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida”gi Vazirlar Mahkamasi qarori qabul qilindi, deb xabar beradi Norma.

Hujjat bilan quyidagilarga o‘zgartirishlar kiritilmoqda:

• Bino va inshootlarning ixtisoslashishini o‘zgartirish, qayta qurish, rekonstruksiya qilish hamda o‘z hududida qo‘shimcha bino va inshootlar qurishni loyihalashtirishga ruxsatnoma berish bo‘yicha davlat xizmatlari ko‘rsatishning maʼmuriy reglamentiga;
• Ko‘chmas mulkka bo‘lgan huquqlarni davlat ro‘yxatidan o‘tkazish bo‘yicha davlat xizmatlari ko‘rsatishning maʼmuriy reglamentiga.

O‘zgartirishlarga muvofiq:

• turar joyni noturar joy toifasiga o‘tkazilayotgan u yerda vaqtinchalik yoki doimiy ro‘yxatdan o‘tkazilgan barcha shaxslar mazkur joy kadastr organlarida qayta rasmiylashtirilguniga qadar ro‘yxatdan chiqarilishlari lozim;
• fuqarolar ro‘yxatdan chiqarilganliklari haqida maʼlumot “Raqamli hukumat” platformasi orqali tekshiriladi;
• obyektning ixtisoslashishini o‘zgartirish bo‘yicha ruxsatnomaga o‘zgartirilgan obyektga biriktirilgan yer uchastkasining chegara sxemasi ilova qilinadi.

Hujjat Qonun hujjatlari maʼlumotlari milliy bazasida eʼlon qilingan va 2023-yil 4-sentabrdan kuchga kirdi.

Bundan oldin Toshkent viloyatida 4 176 ta ko‘chmas mulk manzili o‘zgargani, Toshkent viloyatida prezident sovg‘asi sifatida berilgan uy boshqa shaxsga rasmiylashtirilgani, O‘zbekistonda 3 ming gektar yer o‘zboshimchalik bilan egallab olingani to‘g‘risida xabar berilgandi.