BMT: Afg‘onistonda metamfetamin savdosi keskin oshdi
“Tolibon” ko‘knori yetishtirish va sotishni taqiqlaganidan so‘ng, mamlakatda metamfetamin ishlab chiqarish keskin oshdi. Bu haqda Birlashgan Millatlar Tashkilotiga tayanib, Deutsche Welle xabar berdi.
Ma’lum qilinishicha, Afg‘oniston va qo‘shni mamlakatlarda giyohvand moddalar reydlari chog‘ida qo‘lga kiritilgan metamfetamin miqdori 12 baravarga oshgan — 2017-yildagi 2,5 tonnadan 2021-yilda 29,7 tonnagacha. Ekspertlar bu o‘sishni Afg‘onistonda sintetik giyohvand moddalar ishlab chiqarishning kengayishi bilan izohlaydi.
“Tolibon” rasmiylari BMT da’volarini rad etib, ularni “asossiz ayblovlar” deb atadi. Mamlakat Ichki ishlar vazirligi vakilining aytishicha, ular narkotiklarga qarshi “jiddiy” kurash olib bormoqda.
BMT ma’lumotlariga ko‘ra, Afg‘onistonda metamfetamin mamlakatda mavjud o‘simliklardan kamroq ishlab chiqariladi va ko‘proq shamollashni davolovchi preparatlardan sintez qilinadi.
