Xorazmdagi xususiy bog‘chada bolalarga qo‘pollik qilgan tarbiyachi ishdan olindi

Ijtimoiy tarmoqlarda xususiy bog‘chalarning birida tarbiyachi bolalarni urib uxlatishga urinayotgani aks etgan videolavha tarqaldi. Xorazm viloyati maktabgacha va maktab ta’limi boshqarmasi holat yuzasidan ma’lumot berdi.

Videoda aks etgan holat Xorazm viloyati maktabgacha va maktab ta’limi boshqarmasi ishchi guruhi hamda tegishli vakolatli tashkilot xodimlari hamkorligida o‘rganilgan. Voqea Xonqa tumanidagi “Adolat Dinora orzulari” nodavlat ta’lim muassasasida sodir bo‘lgani aniqlangan.

Tarbiyachi Q.Z. tarbiyalanuvchilarga qo‘pol munosabatda bo‘lgani va ichki mehnat tartib-qoidalarini qo‘pol ravishda buzgani uchun u bilan tuzilgan mehnat shartnomasi bekor qilingan.