Kim Chen Inning qizi KXDRda siyosiy hokimiyat merosxo‘ri bo‘lishi mumkin — OAV

Janubiy Koreya birlashuv vaziri Kim Yong Xo Shimoliy Koreya yetakchisi Kim Chen In o‘z qizi Chju Eni siyosiy hokimiyatning potensial merosxo‘ri sifatida tanlaganini aytdi. Bu haqda Yonhap agentligi xabar qildi.

Chju E endigina o‘n yoshda va birinchi marta o‘tgan yilning 18-noyabr kuni, otasi bilan “Xvason-17” qit’alararo ballistik raketasini uchirish marosimida qatnashganida omma oldida chiqish qilgan.

“Biz hozirda bunday imkoniyatni istisno qila olmaymiz”, — dedi Kim Yong Xo.

Shimoliy Koreya yetakchisi Kim Chen Inning singlisi Kim Yo Chenni ham unutib qo‘ymasdan, undan ehtiyot bo‘lish kerak, deb yozadi Fox News.

Hozirda Kim Yo Chen Shimoliy Koreya Mehnat partiyasi markaziy qo‘mitasi bo‘lim boshlig‘i o‘rinbosari sifatida faoliyat yuritmoqda.