“Tolibon” O‘zbekiston Qo‘shtepa kanalidan zarar ko‘rmasligiga va’da berdi
“Tolibon” matbuot kotibi Zabihulloh Mujohid O‘zbekiston Qo‘shtepa kanalidan jabr ko‘rmasligiga va’da berdi. Bu haqda Ariana News xabar berdi.
Mujohid Kobulga tashrif buyurgan O‘zbekiston delegatsiyaga Qo‘shtepa kanali har ikki davlatga foyda keltirishini aytgan. Kobuldagi uchrashuvlar chog‘ida 500 KV Surxon—Pul-i Xumri energetikasi loyihasi, Amudaryo ustidagi 220 KV elektr tarmog‘ini ta’mirlash, O‘zbekistondan import qilinadigan elektr tarmoqlarini baholash uchun texnik guruh jo‘natish, O‘zbekistonning Afg‘onistondagi xususiy sektori sarmoyasi va suv xo‘jaligini muhokama qilgan.
O‘zbekiston bosh vaziri o‘rinbosari Jamshid Xo‘jayev, ayniqsa, energetika, tog‘-kon sanoati, qishloq xo‘jaligi va transport sohalarida hamkorlik bo‘yicha o‘tkazilgan uchrashuvlarni qimmatli deb atagan.
O‘zbekiston prezidenti Qo‘shtepa kanali haqida
Shavkat Mirziyoyev 15-sentyabr kuni Orolni qutqarish xalqaro jamg‘armasi ta’sischi davlatlari rahbarlari kengashining navbatdagi yig‘ilishida Qo‘shtepa kanali qurilishi borasida o‘z fikrini bildirib o‘tgandi.
“Uning ishga tushirilishi Markaziy Osiyodagi suvdan foydalanish tartibi va muvozanatini tubdan o‘zgartirib yuborishi mumkin”, — degan prezident.
Mirziyoyev Qo‘shtepa kanalining qurilishi va uning Amudaryo suvidan foydalanish tartibiga ta’siri bilan bog‘liq barcha jihatlarni mamlakatlardagi tadqiqot institutlarini jalb etgan holda o‘rganish bo‘yicha qo‘shma ishchi guruhini shakllantirish zarurligini aytgan.
Prezident Afg‘oniston vakillarini suv resurslaridan birgalikda foydalanish bo‘yicha mintaqaviy muloqotga jalb etish masalasini ko‘rib chiqishni taklif etgan.
“Tolibon” munosabati
“Tolibon” Afg‘onistonning Amudaryo suvi bo‘yicha qo‘shnilar bilan hech qanday kelishuvi yo‘qligi, Afg‘oniston suv resurslaridan foydalanish huquqiga ega ekanini aytdi. Afg‘onistonning amaldagi hukumati qo‘shni davlatlar xavotirlarini bartaraf etish uchun Amudaryo suvi muammosini muhokama qilishga tayyor.
“Afg‘oniston Amudaryo suvidan foydalanishga mutlaqo haqli. Bu huquq Afg‘onistonga xalqaro konvensiyalar bilan berilgan va Afg‘oniston Amudaryo suvining 27-30 foiziga egalik qiladi”, — degan suv xo‘jaligi bo‘yicha mutaxassis Najibulla Sadid.
Qo‘shtepa kanali qurilishining ehtimoliy oqibatlari
The Economist prognoziga ko‘ra, agar kanal qurib bitkazilsa, mintaqaviy mojaroning kuchayishiga olib kelishi mumkin. Kanal Amudaryo suvini O‘zbekiston bilan chegaraga yo‘naltiradi. Afg‘oniston elektr energiyasining katta qismini O‘zbekistondan import qilishi hisobga olinsa, “Tolibon” qo‘shni respublikaga qarshi chiqolmaydi.
“Iqlim o‘zgarishi O‘zbekistonni 15 foiz suv yo‘qotishiga sabab bo‘lmoqda, agar kanal qurilishi ortidan yana 10 foiz yo‘qotsa, O‘zbekiston 25 foiz suv yo‘qotishi mumkin”, — deyiladi yana bir prognozda.
