Rossiya qo‘shinlari Ukrainaga ommaviy dron hujumi uyushtirdi (foto)

Rossiya qo‘shinlari 3-noyabrga o‘tar kechasi Shahed tipidagi kamikadze dronlari bilan Ukrainaga keng ko‘lamli hujum uyushtirdi. Ukraina Qurolli kuchlari Bosh shtabining ertalabki hisobotida aytilishicha, Ukraina hududi bo‘ylab 38 ta dron uchirilgan, ulardan 24 tasi urib tushirilgan.

Ukraina Qurolli kuchlari shuningdek, Rossiyaning X-59 raketasini urib tushirganini ma’lum qildi. Bosh shtab dron hujumi oqibatlari haqida hozircha xabar bermadi.

Xarkov viloyati politsiyasi Rossiyaning o‘nta uchuvchisiz uchog‘i mintaqadagi fuqarolik infratuzilmasiga hujum qilganini ma’lum qildi. Dastlabki ma’lumotlarga ko‘ra, qurbonlar yo‘q. Dron zarbalari oqibatida garajlar va avtomashinalar yonib ketgan, xo‘jalik inshootlari shikastlangan.

Politsiyaning ma’lum qilishicha, dronlardan biri ta’lim muassasasiga urilgan. Bino yonib ketgan, ikki qavat va tom vayron bo‘lgan. Yong‘inlar turar joy binosi va ma’muriyat binosida ham sodir bo‘lgan. Barcha yong‘inlar o‘chirildi, deya qo‘shimcha qildi politsiya.

Lvov viloyati rasmiylari ham dron hujumi haqida xabar berdi. Lvov viloyati ma’muriyati raisi Maksim Kozitskiy tunda havo hujumidan mudofaa ishga tushgani haqida yozdi. U hujum oqibatlari haqida xabar bermadi.

Ukraina Qurolli kuchlarining “Janub” operativ qo‘mondonligi matbuot kotibi Natalya Gumenyuk telemarafonda havo hujumidan mudofaa tizimlari qariyb besh soat ishlaganini aytdi.

“Janubda Shahed tipidagi 11 ta dron ustida ish olib borildi va bir kechada yo‘q qilindi: Nikolayev viloyati va Kirovograd viloyatida uchtadan, Odessa viloyatida ikkitadan va Xerson viloyati, Dnepropetrovsk viloyati va Vinnitsa viloyatida bittadan. X-59 raketasi ham Kirovograd viloyatida urib tushirildi”,— deya uning so‘zlaridan iqtibos keltiradi “Ukrainskay pravda”.

Gumenyukning qo‘shimcha qilishicha, Odessa viloyatidagi infratuzilma obyekti texnik hududiga zarba kelib tushgan. Uning so‘zlariga ko‘ra, qurbonlar yo‘q, yetkazilgan zarar ham jiddiy emas.