Qozog‘istonda o‘rtacha ish haqi 750 dollardan oshdi

Qozog‘istonda bir xodimning o‘rtacha oylik ish haqi 350 ming 542 tengedan (753 dollar) oshdi. Bu haqda Qozog‘iston Milliy statistika byurosiga tayanib, DataHub xabar berdi.

Dollarda o‘rtacha choraklik kurs bo‘yicha o‘rtacha oylik ish haqi ko‘rsatkichi 770 dollarni tashkil etdi.

“Taxminan 10 yil oldin, 2013-yil iyulida ham xuddi shunday edi — 739 dollar. Agar yaqin o‘tmishga qaytadigan bo‘lsak, joriy natijalar o‘tgan chorakdagidan yomonroq, o‘shanda bu ko‘rsatkich 814 dollar bo‘lgan, lekin 2022-yilning uchinchi choragidan (631 dollar) yaxshiroq”, — deb xabar beradi DataHub.

Statistik ma’lumotlarga ko‘ra, o‘rtacha oylik ish haqining eng katta o‘sishi quyidagi viloyatlarga to‘g‘ri keldi:

• Jetisuv viloyati — 21,1 foizga;
• Olmaota — 20,8 foizga;
• Qizilo‘rda viloyati — 20,7 foizga.

Milliy statistika byurosi eng yuqori maosh Atirau viloyatida qayd etilgani — 602,4 ming tenge (1294 dollar), eng past daromad esa Turkiston viloyatida — 248,9 ming tenge (534 dollar) kuzatilganini ma’lum qildi.

“Sanoat bo‘yicha eng yuqori ish haqi tog‘-kon sanoati va qazishda o‘rtacha ko‘rsatkichidan 2,2 baravar yuqori, moliya va sug‘urta faoliyatida — 1,9 barobar, axborot va kommunikatsiyalar sohasida — 1,5 barobar, kasbiy, ilmiy va texnik faoliyatda — 1,5 barobar yuqori”, — deya ta’kidlaydi ekspertlar.