Shavkat Mirziyoyev afg‘on xalqiga gumanitar yordam ko‘rsatishni ko‘paytirishga chaqirdi

Shavkat Mirziyoyev 9-noyabr kuni Iqtisodiy hamkorlik tashkilotining 16-sammitida Afg‘oniston masalasiga to‘xtaldi.

Prezident sammit tashkilot a’zolaridan biri bo‘lgan Afg‘oniston ishtirokisiz o‘tayotganiga diqqat qaratdi.

“Asrlar davomida bizga yon qo‘shni bo‘lgan ko‘pmillatli Afg‘oniston xalqini bugungi murakkab muammolari qarshisida yolg‘iz qoldirib bo‘lmaydi. Ushbu mamlakatni mintaqaviy integratsiya jarayonlariga faol jalb etish barqaror taraqqiyotimizning ajralmas va zaruriy shartidir”, — dedi Shavkat Mirziyoyev.

Davlat rahbari sammida ishtirok etayotgan barchani afg‘on xalqiga gumanitar yordam ko‘rsatishni ko‘paytirishga, ushbu mamlakatdagi o‘tkir ijtimoiy-iqtisodiy muammolarni jamoaviy mas’uliyat va maqbul mexanizmlar asosida hal etishga chaqirdi.

Shavkat Mirziyoyev 3-noyabr kuni Turkiy davlatlar tashkiloti sammitidagi nutqida Afg‘oniston xalqiga insonparvarlik yordami ko‘rsatishni susaytirmaslikka chaqirgandi.

“Afg‘on xalqiga insonparvarlik yordami ko‘rsatishni susaytirmaslik, bu yurtdagi o‘tkir ijtimoiy muammolarni hal etishga qaratilgan aniq mexanizmlarni ishlab chiqishga chaqiramiz. Bizga mintaqaviy sheriklik va barcha qo‘shnilari bilan iqtisodiy hamkorlik jarayonlarida faol ishtirok etadigan, tinch va barqaror Afg‘oniston kerak”, — degan edi prezident.

O‘zbekiston afg‘on xalqiga bundan buyon ham zarur yordamni berib borishini bildirgandi.