“AQSHning Yaqin Sharqdagi bazalariga qilingan hujumlar uchun javob zarbasi beriladi” — Pentagon rahbari Lloyd Ostin
Amerika Qo‘shma Shtatlari Yaqin Sharqdagi bazalariga qilingan hujumlar uchun Vashington tanlagan vaqtda javob berishi mumkin.
Bu haqda Pentagon rahbari Lloyd Ostin Hindiston poytaxtida jurnalistlar bilan uchrashuvda aytib o‘tdi.
“Xalqimizning xavfsizligi — bizning ustuvor vazifamiz. Qachon zarba berishimizni oldindan aytib bera olmaymiz yoki loyihalashtira olmaymiz. Biz buni o‘zimizga qulay vaqtda qilamiz. Bizning obyektlarimiz va odamlarimizga hujumlar to‘xtatilishi kerak”, — dedi u.
Avvalroq AQSH Harbiy-havo kuchlari Suriya shimolidagi qurol-yarog‘ omboriga, Isroil qo‘shinlari esa mamlakat janubidagi nishonlarga hujum uyushtirgani xabar qilingandi.
Pentagon rahbari Lloyd Ostinning ta’kidlashicha, AQSH Eron islom inqilobi muhofizlari korpusi tomonidan foydalanib kelingan obyektlarga zarba bergan. Buning fonida Amerikaning Suriya va Iroqdagi bazalari yana hujumga uchragan, Yamanda esa AQSHga tegishli dron urib tushirilgan.
