Toshkentda maktab o‘quvchisi is gazidan ogohlantiruvchi qurilma yaratdi

Toshkentda maktab o‘quvchisi is gazidan ogohlantiruvchi qurilma yaratdi. Bu haqda Maktabgacha va maktab ta’limi vazirligi matbuot xizmati xabar berdi.

Ushbu qurilma 9-sinf o‘quvchisi bo‘lgan Ozodbek Hoshimov tomonidan ixtiro qilingan bo‘lib, u uch yildan buyon robototexnika to‘garagiga qatnab kelgan. Qurilma gaz, olov va tutun yuzaga kelganda uy egalarini ogohlantirish, shuningdek, o‘t o‘chiruvchilarga xavf yuzaga kelgan joydan geolokatsiya tashlab, SMS xabarnoma yuboradi.

“Qish mavsumi edi. Odamlar is gazidan vafot etdi degan mashʼum xabarlarni OAV orqali o‘qib, eshitganimda, buning oldini olish kerak degan o‘y keldi va buning ortidan mana shu ixtironi yaratish g‘oyasi tug‘ildi. Agar ushbu ixtiro tegishli xizmatlar bilan integratsiya qilinsa, albatta bunday baxtsiz hodisalarning oldi olinishiga ishonaman”, — deydi o‘quvchining o‘zi.

Ayni damda uning ixtirosini patentlash jarayoni kechmoqda.