O‘zbekiston energetika tarmog‘ini yangilash uchun qancha mablag‘ sarflandi? Energetika vaziri javob berdi
O‘zbekiston energotarmog‘ini yaxshilashga bugungi kungacha 14 trillon so‘mga yaqin mablag‘ jalb qilindi. Bu haqda 22-noyabr kuni bo‘lib o‘tgan Oliy Majlis Qonunchilik palatasining “Hukumat soati”da energetika vaziri Jo‘rabek Mirzamahmudov ma’lum qildi.
Hukumat soatida deputat Sanjar Hamidullayev Toshkent shahar elektr tarmoqlarini yangilash uchun sarflangan mablag‘ miqdori bilan qiziqdi.
“Toshkent shahar elektr tarmoqlarini yangilash uchun qancha mablag‘ sarf qilindi, bu mablag‘ qayerdan olindi va qachon qaysi manba hisobidan qaytarib beriladi?”, — dedi deputat.
Energetika vaziri hozirgi kunda energetika tarmog‘iga sarflangan mablag‘lar nafaqat Toshkent shahar, respublika bo‘yicha 14 trillion so‘mga yetganini ma’lum qildi. Vazirning qayd etishicha, bu mablag‘lar davlat budjeti mablag‘lari, mahalliy hokimliklar mablag‘lari va kredit resurslaridan iborat bo‘ldi.
Import uskunalar, kabel, o‘zimizda chiqmaydigan transformatorlarni chetdan olib kelingani inobatga olinib, kredit resurslari olindi. Buni iqtisodiyot va moliya vazirligi tegishli qarorida barcha ko‘rsatkichlari, qanday qaytarish, “Hududiy elektr tarmoqlari” tomonidan o‘zining moliyaviy oqimlarida kreditlarni qaytarishi — hammasi inobatga olingan, — dedi Jo‘rabek Mirzamahmudov.
Energetika vaziri bu bo‘yicha batafsil ma’lumot kerak bo‘lsa alohida yopiq xatlar bilan keltirib berilishini bildirdi.
