Jozep Borrel Yevropa hamjamiyatini Ukrainadagi harbiy harakatlarni unutmaslikka chaqirdi
Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel Yevropa hamjamiyatini Isroil va Falastinning HAMAS harakati o‘rtasidagi urush fonida Ukraina hududidagi harbiy amaliyotlarni unutmaslikka chaqirdi.
“Kim Sudandagi vaziyat haqida gapiryapti? Kim Afrika haqida gapiryapti? Sahel haqida kim gapiryapti? Ko‘p yillar davomida mavjud bo‘lgan nizolar haqida kim gapiradi? Bizning jamiyatimiz bir vaqtning o‘zida faqat bitta aniq mojaro haqida gapira oladiganga o‘xshaydi. Hozirda bu Falastin va Isroildagi inqiroz.
Ammo Ukrainadagi urush har kuni davom etmoqda va ko‘plab odamlarning hayotiga zomin bo‘lmoqda. Shuning uchun biz mudofaamizni rivojlantirishni va Ukraina mudofaasini qo‘llab-quvvatlashni kamaytira olmaymiz, chunki oxir-oqibat ular bir xil ahamiyatga ega. Kelajagimiz uchun kurash”, — dedi Borrel Yevropa mudofaa agentligining yillik konferentsiyasida.
27-noyabr kuni Yevropa diplomatiyasi rahbari G‘azo sektoridagi vaziyat tufayli YI uchun Ukraina bo‘yicha qarorlarni qo‘llab-quvvatlashga erishish qiyinroq bo‘lishini aytdi.
Uning tushuntirishicha, ayrim davlatlar Yevropa Ittifoqi bilan “munosabatlarini uzgan” yoki ittifoqning G‘azo bo‘yicha pozitsiyasi o‘ziniki bilan mos kelmasligini elchilar orqali ma’lum qilgan.
