G‘azoda janglar qayta boshlanganidan so‘ng 109 kishi halok bo‘ldi
1-dekabr tongida o‘t ochishni to‘xtatish kelishuvi tugaganidan beri Isroil hujumlari oqibatida 109 kishi halok bo‘ldi, yana yuzlab kishilar yaralandi. Bu haqda G‘azo sektori Sog‘liqni saqlash vazirligi vakili Ashraf al-Qudra departamentning Telegram kanalida ma’lum qildi.
Bir necha soat oldin 60 kishining o‘limi haqida xabar berilgan edi.
Isroil mudofaa kuchlari HAMASni provokatsiyalar va Isroil hududini o‘qqa tutishda aybladi. Quruqlikdagi operatsiyalarning qayta tiklanishi hali e’lon qilinmagan. Isroil G‘azo sektoridagi nishonlarga havodan hujumlar uyushtirmoqda.
Kelishuv doirasidagi sulh 24-noyabr kuni kuchga kirgandi. O‘tgan vaqt davomida HAMAS tomonidan garovga olinganlar Isroil qamoqxonalaridagi falastinlik asirlarga almashtirildi.
Dastlab sulhning amal qilish muddati to‘rt kun bo‘lishi kerak edi, keyin tomonlar vositachiligida u uzaytirildi.
