Isroil armiyasi Rafahda 90 daqiqalik “taktik pauza” e’lon qildi

Isroil harbiylari bugun G‘azo janubidagi janglarda vaqtinchalik tanaffus bo‘lishini ma’lum qildi.

“Gumanitar yordam yetkazilishiga ruxsat berish uchun bugun mahalliy vaqt bilan soat 14:00 gacha Rafah hududida mahalliy taktik pauza amal qiladi”, — deyiladi Isroil armiyasi bayonotida.

Yana bir xabarda pauza Rafahning El-Geneyna hududida amal qilishi aniqlangan.

Bunday pauzalar vaqti-vaqti bilan G‘azoning turli qismlarida e’lon qilinmoqda. Yaqin-yaqingacha Rafah shafqatsiz janglar o‘tkazilmaydigan, nisbatan xavfsiz hudud hisoblanardi.

Biroq o‘tgan juma kuni HAMAS bilan sulh tugaganidan so‘ng Isroil armiyasi G‘azoning bu qismida faol harbiy amaliyotlar o‘tkaza boshladi.