Toshkentda 4 nafar fuqaro elektromobillarni quvvatlash qurilmalaridan noqonuniy foydalanib kelgani aniqlandi
Toshkent shahar Yakkasaroy tumanida to‘rt nafar fuqaro noqonuniy tarzda elektromobillarni quvvatlash qurilmalaridan foydalanib kelayotgani aniqlandi, deb xabar beradi “O‘zenergoinspeksiya” matbuot xizmati.
Qayd etilishicha, Energetika vazirligi huzuridagi “O‘zenergoinspeksiya” tomonidan tegishli tashkilotlar hamkorligida Toshkent shahrining Mirobod va Yakkasaroy tumanlaridagi elektromobillarni quvvatlash qurilmalarida texnik qoidalarga rioya qilinganligi bo‘yicha nazorat tadbirlari o‘tkazilgan.
Xususan, Yakksaroy tumanida to‘rtta iste’molchi o‘rnatilgan tartibda hujjatlarni rasmiylashtirmasdan, elektr hisoblagichsiz, ko‘p qavatli uyning bosh taqsimlash shitiga ulangan holda, “Elektr hisob” dasturiga kiritmasdan elektr energiyasidan noqonuniy foydalanib kelayotgani aniqlangan.
Mazkur iste’molchilar elektr tarmog‘idan ajratildi. Ularga nisbatan belgilangan tartibda choralar ko‘rish uchun tegishli hujjatlar huquqni muhofaza qiluvchi organlarga taqdim etildi, — deyiladi xabarda.
Ma’lumot uchun, O‘zbekistonga yanvar-oktyabr oylarida xorijning 19 ta davlatidan 22 492 ta elektromobil olib kelingan. Olib kelingan elektromobillarning umumiy qiymati 582,3 million dollarni tashkil etib, o‘tgan yilning mos davriga nisbatan import hajmi 6 barobardan yuqori o‘sgan.
