“Qirg‘iziston 30 yildan beri korrupsiya tufayli rivojlanmadi” — Sadir Japarov

Qirg‘iziston deyarli 30 yildan beri korrupsiya tufayli rivojlanmadi. Bu haqda mamlakat prezidenti Sadir Japarovning ikkinchi Xalq Qurultoyidagi nutqiga tayanib, 24.kg xabar berdi.

Japarovning ta’kidlashicha, korrupsiyaga qarshi choralar tufayli milliardlab dollarlar davlat g‘aznasiga qaytmoqda. Bundan tashqari, uyushgan jinoiy guruhlarga qarshi kurash ishlari olib borilmoqda.

“Jinoiy elementlar mavjud bo‘lgan mamlakatga hech qanday investor pul tikmaydi. Bundan tashqari, ayrim mansabdor shaxslar investorlarning ishiga aralashib, poraxo‘rlik va lobbichilik bilan shug‘ullanadi. Bu mamlakat obro‘siga putur yetkazadi. Korrupsiyaga qarshi shafqatsiz kurash davom etadi va yanada kuchaytiriladi”, — dedi siyosatchi.

Japarov Qirg‘izistonda 2025-2030-yillarga mo‘ljallangan korrupsiyaga qarshi kurashish bo‘yicha Davlat strategiyasini ishlab chiqish bo‘yicha ishchi guruh tuzilganini aytdi. Uning zimmasiga korrupsiyaga qarshi samarali chora-tadbirlarni amalga oshirish rejasini ishlab chiqish vazifasi yuklatilgan.

“Korrupsiyaga qarshi kurash bir martalik tadbir emas, bu doimiy ish bo‘lishi kerak”, – dedi Sadir Japarov.