“Tirik qolishimga o‘zim ham, shifokorlar ham ishonmaganmiz” — xonanda Madonna ikki kun koma holatida bo‘lgani haqida aytdi
Amerikalik taniqli xonanda Madonna ikki kun koma holatida bo‘lganligini maʼlum qildi. Bu holat unda bakterial infeksiya bilan kasalxonaga yotqizilgan paytda sodir bo‘lgan.
Xonanda hayot bilan xayrlashganini tan oldi. Hatto shifokorlar ham umidini uzgan.
“Tirik qolishimga o‘zim ham, shifokorlar ham ishonmaganmiz”, — deydi qo‘shiqchi.
Shuningdek, u hayotini saqlab qolganlarga, ayniqsa, uni vannada hushsiz holda topgan ayolga minnatdorchilik bildirdi.
“Meni kasalxonaga olib kelgan ayolga rahmat aytaman. Men hatto hech narsani eslay ham olmayman. Vanna polida hushimdan ketib, jonlantirish bo‘limida uyg‘ondim”.
Shu bilan birga, Madonna hushiga kelganida, barcha farzandlarini bir xonada to‘planganini ko‘rib, “Demak o‘lishim kerak ekan-da”, — deb hazillashganini qo‘shimcha qildi.
Xonandaning Karlos Leondan bir qizi, rejissor Gay Richidan o‘g‘li va to‘rt nafar asrab olgan farzandi bor.
Maʼlumot uchun, 65 yoshli yulduz iyun oyi oxirida hushsiz holda kasalxonaga yotqizilgan. Ko‘p o‘tmay, xonandaning menejeri unda jiddiy bakterial infeksiya borligi haqida xabar bergan edi.
