Frenk Uorren: “Ronaldu “Arsenal” bilan shartnoma imzolamoqda” 

“An-Nassr” hujumchisi Krishtianu Ronaldu Ar-Riyod shahrida bo‘lib o‘tgan boks oqshomiga tashrif buyurdi.

Ushbu boks oqshomining asosiy jangi Entoni Joshua va Otto Vallin o‘rtasida kechdi. Joshua 5-raunddan so‘ng texnik nokaut evaziga Vallinni mag‘lub etdi.

Portugaliyalik futbolchi UFC yulduzi Konor Makgregor va yana bir qancha boks afsonalari oldidan joy oldi. Promouter Frenk Uorren Ronaldu bilan suhbatlashish imkoniyatini qo‘ldan boy bermadi. 

71 yoshli angliyalik Uorren “Manchester Yunayted” sobiq futbolchisi “Arsenal” bilan shartnoma imzolashi kerakligi borasida hazillashdi. 

“U “Arsenal” bilan shartnoma imzolamoqda!”, — dedi Frenk telekameralar uning qarshisiga borganda. Krishtianu esa bunga javoban kulib qo‘ydi.

Eslatib o‘tamiz, Ronaldu 2003-yildan 2009-yilgacha, 2021-yildan 2022-yilga qadar “Manchester Yunayted” sharafini himoya qilgan.