Transport vaziri Afg‘oniston tomoni bilan temir yo‘l tashuvlariga imtiyozlar berish masalasini muhokama qildi
O‘zbekiston transport vaziri Ilhom Mahkamov Afg‘oniston transport va fuqaro aviatsiyasi vaziri vazifasini bajaruvchi Hamidullo Oxunzoda boshchiligidagi delegatsiya vakillari bilan uchrashuv o‘tkazdi. Bu haqda Transport vazirligi matbuot xizmati xabar berdi.
Qayd etilishicha, uchrashuvda tomonlar transport va logistika sohasidagi hamkorlik aloqalarini rivojlantirish maqsadida qator masalalarni muhokama qilgan. Xususan:
- avtomobil tashuvlarida undiriladigan yig‘im va to‘lovlarni paritet asosida undirilishini taʼminlash;
- Afg‘oniston hududi orqali tranzit hamda ikki tomonlama tashuvlarni rivojlantirish;
- temiryo‘l tashuvlaridagi tarif stavkalariga imtiyozlar taqdim etish.
Shuningdek, tomonlar O‘zbekiston—Afg‘oniston—Pokiston temiryo‘l qurilishi loyihasini jadallashtirish bilan bog‘liq masalalarni muhokama qilgan.
Avvalroq Afg‘onistonning Hirot viloyatida ishlab chiqarilgan gaz tankerlari ilk bor O‘zbekistonga eksport qilingani to‘g‘risida xabar berilgandi. Undan oldin esa “Tolibon” matbuot kotibi Zabihulloh Mujohid O‘zbekiston Qo‘shtepa kanalidan jabr ko‘rmasligiga va’da bergan edi.
