Ukraina 2023-yil davomida qancha miqdorda xalqaro yordam olganini e’lon qildi
Ukraina moliya vaziri Sergey Marchenkoning aytishicha, 2023-yilda mamlakat xalqaro yordam sifatida 42 milliard dollardan ortiq mablag‘ olgan.
Marchenkoning so‘zlariga ko‘ra, 42 milliardning barchasi budjet ehtiyojlari va ichki bozordagi rekord miqdordagi qarzni qoplashga ketgan. Uning ta’kidlashicha, bu barcha zarur xarajatlarni, birinchi navbatda, harbiy xarajatlarni moliyalashtirish imkonini berdi.
Marchenko daromad bo‘yicha rejalar bajarilishiga umid bildirdi, ammo bojxona daromadlari bo‘yicha rejani bajarish ehtimoli kamligini ham ta’kidladi. Uning qo‘shimcha qilishicha, Ukraina Xalqaro valyuta fondining (XVF) kengaytirilgan moliyalashtirish dasturi va Yevropa Ittifoqining makromoliyaviy yordami bo‘yicha o‘z majburiyatlarini bajargan.
Shu bilan birga, vazir Ukraina tashqi hamkorlarga qaramlikni kamaytirish choralarini ko‘rishi kerakligini aytdi.
Avvalroq Marchenko Ukrainaning 2024-yil uchun xalqaro moliyalashtirishga bo‘lgan ehtiyoji davlat budjetining daromadlarini maksimal darajada oshirish, ichki qarz olish bozorini faollashtirish va barcha budjet xarajatlarini qisqartirish bo‘yicha chora-tadbirlar tufayli 41 milliarddan 37,3 milliardga qisqartirilganini ma’lum qilgandi.
2022-yilda Ukraina tashqi moliyalashtirish uchun 32,1 milliard dollar jalb qilgandi.
