AQSH davlat kotibi G‘azodagi tinch aholini ko‘chirishga qarshi ekanini bildirdi
G‘azo sektoridagi tinch aholi zarur sharoitlar yaratilgach, uyiga qaytishi kerak. Bu haqda 7-yanvar kuni Qatar poytaxti Dohada bo‘lib o‘tgan matbuot anjumanida AQSH davlat kotibi Entoni Blinken ma’lum qildi. G‘azo tinch aholisiga mintaqani tark etishi uchun bosim o‘tkazishni qabul qilib bo‘lmaydi, dedi diplomat.
Iordaniyaga tashrifi chog‘ida Blinken G‘azo sektoridagi gumanitar vaziyat yomonlashganini ta’kidladi. U Isroilga bo‘lajak tashrifi chog‘ida rasmiylarga G‘azo sektorida tinch aholi qurbon bo‘lishining oldini olish uchun ko‘proq harakat qilish zarurligini aytmoqchi.
Shu bilan birga, AQSH Davlat departamenti rahbari mintaqadagi “chuqur keskinlik”dan xavotir bildirdi. Yaqin Sharq mojarosi “metastazalar” berishi va “ yanada ko‘proq beqarorlik va azob-uqubatlarga” olib kelishi mumkin, deb ogohlantirdi Blinken.
Yaqin Sharqdagi g‘arb diplomatlari
AQSH davlat kotibi Yaqin Sharq bo‘ylab safari doirasida Iordan daryosi G‘arbiy sohili, Birlashgan Arab Amirliklari, Saudiya Arabistoni va Misrga ham tashrif buyuradi. Amerika diplomatining safari g‘arb davlatlarining mojaro avj olishi oldini olishga qaratilgan sa’y-harakatlari fonida amalga oshirilmoqda.
Xuddi shu kunlarda Germaniya tashqi ishlar vaziri Annalena Berbok va Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel ham mintaqada bo‘lib turibdi. Germaniya tashqi ishlar vaziri avvalroq Isroilni G‘azo sektoridagi tinch aholini himoya qilishga chaqirgandi.
