“Husiylar AQSH va Britaniyaga qarshi muvaffaqiyatli javob qaytarmoqda” — Erdo‘g‘on
Turkiya prezidenti Rajab Toyyib Erdo‘g‘on jurnalistlar bilan suhbatda AQSH va Britaniyaning Yamandagi husiylar nishonlariga bergan zarbalariga izoh berdi. Uning so‘zlariga ko‘ra, Amerika va Britaniya hukumatlari “Qizil dengizni qonli dengizga aylantirishga harakat qilmoqda”. Turkiya prezidentining so‘zlarini TRT Haber telekanali keltirmoqda.
“Bu yerda nomutanosib kuch ishlatish ro‘y bermoqda. Amerika hozirda Isroil va Falastindagi bu nomutanosib kuchdan xuddi shunday foydalanmoqda. Eron bularning barchasidan o‘zini himoya qilish yo‘llarini qidirmoqda. Angliya bu jarayonda Amerika bilan birgalikda qadam tashlagan va shunday qilishda davom etadi”, — dedi Erdog’on.
Turkiya prezidenti undagi maʼlumotlarga ko‘ra, husiylar o‘zlarini yaxshi himoya qilayotgani va Amerika hamda Angliyaga qarshi muvaffaqiyatli javob berayotganini ham aytib o‘tdi.
12-yanvarga o‘tar kechasi Buyuk Britaniya va AQSH Yamandagi husiylarning 60 ta nishoniga hujum qildi. Radarlar, havo hujumidan mudofaa tizimlari, shuningdek, dron va raketalar uchun omborlar va uchirish maydonchalari asosiy nishonga aylandi.
Husiylar Yamandagi nishonlarga 73 ta zarba berilgani, 5 askarning halok bo‘lganini ma’lum qildi. Hujumni Avstraliya, Bahrayn, Kanada va Niderlandiya qo‘llab-quvvatladi. Kreml hujumni qoralab, bu xalqaro qonunlarga zid ekanini aytdi.
